Azərbaycan II Liqasında XVII tura yekun vurulub.

Birincilik iddtiasından əl çəkməyən "Cəbrayıl" İmişlidə "Kür-Araz"ın qonağı olub.

Səbuhi Bayramovun idarə etdiyi görüşün keçirildiyi məkan hər iki komandaya əziyyət verib. Yağışdan çıxmış meydan o qədər bərbad vəziyyətə düşüb ki…

Kələ-kötür sahədə baxımlı oyundan əsər olmayıb, sadəcə, mübarizə! Burada isə "Cəbrayıl"ın bəxti gətirib.

Elvin Məmmədovun kapitan sarğısını daşıdığı komanda hesabı 41-ci dəqiqədə açıb. "Karvan"dan 1200 manat qarşılığında düşərgəyə cəlb olunmuş Ruslan Voronsov az qala mərkəzdən qapıçıyla təkbətək çıxaraq, toru silkələyib.

Qonaqlar fasilə öncəsi azlıqda qalıb. Qapıcı Fərman Bayramov cərimə meydançasından kənarda Ramazan Abbasovu təpik bahasına dayandırıb.

Bununla belə, cəbrayıllılar 54-cü dəqiqədə ikinci qola imza atıb. Baxşəli Baxşəliyev sol cinahdan qapının uzaq küncünü dəqiq nişan alıb.

"Kür-Araz"dan Müseyib Vəlizadənin qolu da gözəlliyi ilə göz oxşayıb. 23 yaşlı hücumçu təqribən 25-30 metr məsafədən «mövsümün ən yaxşıları» kateqoriyasına daxil ola biləcək zərbəylə yadda qalıb.

İmişli təmsilçisi son 30 dəqiqədə hesabı bərabərləşdirməyə can atıb. Çoxsaylı epizod yaradıblar. Hətta böyük qarın «buraxmış» Cavid İmamverdiyev iki dəfə əla fürsəti boşa verib.

Bununla, qarşılaşma Cavid Hüseynovun durjinasının 2:1 hesablı qələbəsi ilə başa çatıb.

Xallarını 37-yə yüksəldən "Cəbrayıl" turnir cədvəlinin 3-cü pilləsində qərarlaşıb. 25 xalı olan "Kür-Araz" isə 8-ci yerdədir.

SPORTİNFO.AZ