Azərbaycan II Liqasında XVI tura yekun vurulub.
"Şəki Siti" doğma meydanda lider "Baku Sportinq"i qəbul edib.
Hesabat həftəsinin ən gözlənilməz nəticəsi məhz burada qeydə alınıb.
Şəkiyə asan qələbə arxasınca gələn Elman Sultanovun komandası ilk 14 dəqiqədə «soyuq duş» alıb. Tural Məmmədzadə 5 dəqiqə ərzində dubla imza atıb.
O, öncə qapıçı Cəfər Əlizadənin səhvindən sonra önünə düşən topu qapıdan keçirib. Bu zaman topdaşıyan balaca uşaq sevincini yaxınlıqda dayanan polisi qucaqlamaqla qeyd edib.
İkinci qol da birinciyə bənzəyib. Turalın qolun keyfini Ronaldo kimi yaşaması diqqətdən qaçmayıb.
Çempionatın lideri yalnız son 30 dəqiqədə özünə gəlib. Qonaqlar iki künc zərbəsindən başla fərqlənib.
Gəl ki, onların gücü 1 xal qazanmağa da çatmayıb. 90+4-cü dəqiqədə C,Əlizadə şəkili hücumçunun önünü kobudluqla kəsib.
Baş hakim qapıçıya sarı vərəqə göstərməsə də, penalti nöqtəsini nişan verib. Yusif Cəfərov fürsəti qaçırmayıb və stadiona toplaşan 700 azarkeşi riqqətə gətirib.
Beləliklə, qarşılaşma bölgə təmsilçisinin 3:2 hesablı qələbəsi ilə başa çatıb.
Xallarını 27-yə yüksəldən "Şəki Siti" turnir cədvəlinin 6-cı pilləsində qərarlaşıb. 38 xalı olan və ilk məğlubiyyətini Şəkidə alan "Baku Sportinq" isə liderliyini davam etdirir.
SPORTİNFO.AZ
Şəki şəhər stadionu. 700 tamaşaçı |
|
|
|||
|