Azərbaycan II Liqasında XV tura yekun vurulub.

"Qusar" Sumqayıtda "Füzuli"ni qəbul edib.

Qarşılaşma qonaqların 3:1 hesablı qələbəsi ilə başa çatıb.

Hesabı 17-ci dəqiqədə qonaqlardan Elvin Nəsibov açıb. Hücumçu dirəkdən dönən topu yaxın məsafədən qapıya göndərib.

Bundan 2 dəqiqə sonra «Füzuli» azlıqda qalıb. Uzun topa birinci çatan Aslan Hüseynovu cərimə meydançasından kənarda kobudluqla dayandıran Kamil Nəzərli qırmızı vərəqə görüb.

Buna rəğmən, Qarabağ təmsilçisi üstünlüyünü əldən verməyib, əksinə, onu bir qədər də gücləndirib. Böyük qüvvə ilə irəli atılan qusarlıların müdafiəyə boşluqlar buraxmasından istifadə ediblər.

Öncə Emin Quliyev belə epizodlardan birində qapıçı ilə dueldən qalib ayrılıbsa, daha sonra «Neftçi»nin yetirməsi Mirkamil Əliyev uzaq məsafədən sol ayaqla gözəl vuruş sərgiləyib.

Şimal komandasının gücü yalnız təsəlli qoluna çatıb.

Adı iştirak ərizəsində yer almayan, amma def-akto baş məşqçi olan Kamran Əlibabayevin oğlu Vüqar Əlibabayev baxımlı zərbəylə «Füzuli»nin qapısına yol tapıb.

«Qusar» qarşıdakı dəqiqələrdə daha böyük hesabla məğlub ola bilərdi. Qapıçı İmran Məhərrəmovun seyvləri və tir bir neçə fraqmentdə «Füzuli»yə mane olub.

Oyun ərzində daha bir diqqətçəkən hadisə qapı torunun cırılmasıdır. Belədə «Qusar»ın məşqçisi Kamran Nurəhmədov meydana daxil olaraq, onu düzəldib. Əsl toxucu kimi.

Xallarını 32-yə yüksəldən "Füzuli" turnir cədvəlinin 3-cü pilləyə yüksəldib. 29 xalı olan "Qusar" isə 5-ci yerə düşüb.

SPORTİNFO.AZ