Azərbaycan II Liqasında XV tur arxada qalıb.

"Şəfa" Binədə "Lerik"i qəbul edib.

Elvin Bayramovun idarə etdiyi qarşılaşma paytaxt təmsilçisinin 3:2 hesablı qələbəsi ilə başa çatıb.

Matç kifayət qədər baxımlı alınıb.

Ev sahiblərindən Əli Əliyev ilk 33 dəqiqə ərzində dublunu rəsmiləşdirib. Hücumçu hər iki halda müdafiəçilərin mövqe səhvindən yararlanıb.

Fasiləyədək yuxulu təsir bağışlayan cənub təmsilçisi yalnız bir dəfə «çərçivə»yə düşə bilib. Onda da referi Kamran Abdullazadənin ikinci cəhddə vurduğu qolu qeydə almayıb.

«Xəzər Lənkəran»ın yetirməsi olan kapitanın son anda qapıçının əlinə zərbə endirərək, topu tora göndərməsini bəhanə gətirib. Halbuki burada xəta «Şəfa»nın kiperi Fərrux Əzizovda idi.

İkinci hissəyə aktiv başlayan leriklilər ardıcıl 3 dəfə fərqlənib. Yenə onlardan biri ofsayd olması iddiasıyla hesaba alınmayıb.

Azad Bayramzadənin 62-ci dəqiqədə vurduğu qolda isə F.Əzizovun «xidmət»i daha böyükdür. Kadrlara baxsaz, onun necə uşaq səhvinə yol verməsini görəcəksiz.

Qarşılaşmada yekun nöqtəni Cavanşir Tahirov qoyub. 66-ci dəqiqədə meydana daxil olmuş gənc forvard künc zərbəsindən sonra qapı önündə yaranan qarışıqlıq zamanı bir vuruşla nəticəni müəyyənləşdirib.

Bundan öncə isə «Şəfa»dan Ramiz Qasımov Messisayaq reyd edərək əla qol vurmağa yaxın olsa da, top qapı tirindən dönüb. «Lerik» isə axır dəqiqələrdə iki əla fürsəti boşa verib.

15 turdan sonra 7 xal toplayan "Şəfa" turnir cədvəlinin 13-cü pilləsində qərarlaşıb. 12 xalı olan "Lerik" isə 11-ci yerdədir.

SPORTİNFO.AZ