II Liqada 14-cü turun matçlarına start verilib.

Çempionatın iddialılarından olan “Cəbrayıl” səfərdə “Göygöl”ün qonağı olub.

Matç ev sahiblərinin qələbəsi ilə yekunlaşıb. “Göygöl”dən Ülvi Cəlilov qonaqların müdafiə xəttində yaranan boşluqdan istifadə edərək, 6-cı dəqiqədə hesabı açıb.

“Cəbrayıl” 65-cı dəqiqədə avtoqola sevinib. Tapdıq Əhmədov əks-hücum zamanı önünə gələn topu yaxın istiqamətdən qapıya tərəf istiqamətləndirib.

Bu anda “yuvarlaq meşin”ı uzaqlaşdırmağa çalışan Coşqun Abdıyev onu səhvən “çərçivə”yə göndərib.

Bundan sonra oyun nisbətən canlanıb. Tərəflər artıq daha açıq futbol sərgiləməyə başlayıb.

“Cəbrayıl” belədə hesabda önə keçmək üçün fürsət yaxalayıb, Elvin Nəsibov əlverişli mövqedən qapıya düşə bilməyib.

Qarabağ təmsilçisinin tədricən ərazi üstünlüyünə yiyələndiyi bu dəqiqələrdə qəfildən Elvin Dəmirov ortaya çıxıb. Müdafiəçi iki dəqiqə aralığında iki sarı vərəqə alaraq, komandasnını çətin vəziyyətdə buraxıb.

Öncə rəqibinə qarşı qeyri-idman hərəkətinə yol verib, ardınca hakimə sərt etiraz bildirib. Referi Əli Əliyev 30 tamaşaçının önündə qırmızı vərəqəni çıxarınca, Dəmirov bir az da hirslənib, onun üzərinə yeriyirib.

Elə təəssürat yaranıb ki, Elvin “fit sahibi”ni sillələyəcək. ancaq o, çətin də olsa, özünü toparlaya, əsbəblərini cilovlaya bilib.

Say üstünlüyü “Göygöl”ün işinə yarayıb. Ziyabil Məmmədov 90+1-ci dəqiqədə müdafiəçidən dönən topu cərimə meydançasının künc dairəsindən birbaşa qapının uzaq küncünə fırlayıb.

Zərbə gözəl alınıb və qapıçı Nurlan Quluzadəyə başı üzərindən gedən topa sadəcə seyr etmək qalıb.

SPORTİNFO.AZ