«Stadionumuz təmirə bağlanıb, ona görə oyunlarımızı bir müddət doğma rayonumuzda keçirə bilməyəcəyik».
Bu sözləri Sportinfo.az-a açıqlamasında «Lerik»in prezidenti Famil Məmmədov deyib.
Yeni mövsümdən II Liqada mübarizə aparacaq cənub klub rəqiblərini Lənkəranda qəbul edəcək.
Müsahibin bildirdiyinə görə, ev oyunlarını qonşu rayonda yerləşən Olimpiya Kompleksində qəbul edəcəklər: «Artıq kompleksin rəhbərliyi ilə danışmışıq və müqavilə imzalamağa hazırlaşırıq».
İlk dəfə təşkil olunan II Liqada yarışmaya sentyabrda start veriləcək. Çempionatda 14 komanda qüvvəsini sınayacaq.
