Aylardan bəri davam edən maliyyə problemlərini yeni sponsorun sayəsində aradan qaldırmağa müvəffəq olan «Mingəçevir» I Liqanın ikinci hissəsinin hazırlıqlarına start verib.
«İşıqçılar» təmsilçisi olduğu şəhərdə çalışmalara başlayıb.
Hələlik gələnlər olmasa da, gedənlər var. Qapıçı Sahib Həsənov həqiqi hərbi xidmətə yollanıbsa, Rəhim Cəfərli «İmişli»yə qayıdıb.
Həmçinin iki legioner Ramiz Məmmədovun «qara siyahı»sına düşüb.
Bunlar yarımmüdafiəçilər - qambiyalı Jayte Bakari və Usman Abbadır. Hər iki afrikalı ilə müqaviləyə qarşılıqlı razılıq əsasında xitam verilib.
«Mingəçevir» sezonun geridə qalan hissəsində 21 xal toplayıb və turnir cədvəlinin dördüncü pilləsində yer alıb. Məqsəd yenə dəyişməyib – çempionluq! Baş məşqçi iddialarından dönmədiklərini saytımıza son açıqlamasında da dilə gətirib.
Təcrübəli mütəxəssis qarşıda hələ 15 turun olmasına diqqət çəkərək, birincilik savaşını axırıncı həftəyədək davam etdirəcəklərini bildirib.
SPORTİNFO.AZ
