Premyer Liqanın ikinci dövrəsinin ilk turunda “Qarabağ“ı 3:1 hesabıyla üstələyən “Səbail” bu qələbə ilə iki uğursuz seriyaya da son qoyub.
Sportinfo.az xəbər verir ki, bakılılar ardıcıl 4 məğlubiyyətdən sonra meydanı 3 xalla tərk edib.
Aftandil Hacıyevin komandası III turun “Sumqayıt”la sentyabrın 11-dəki görüşündən (1:0) sonra xala həsrət idi.
Həmçinin, Bayıl təmsilçisi texniki qələbə nəzərə alınmamaqla, ilk dəfə “Qarabağ”a qalib gəlib.
Bu, rəqiblərin 17-ci duelinə təsadüf edib ki, əvvəlki 16 matçdan birində texniki qələbə bakılılara verilib. Hacıyev Azərbaycan çempionatları tarixində 25 və daha çox qələbə qazanan 44-cü baş məşqçidir.
