Almaniya millisi 20 ildən sonra dünya çempionatlarının seçmə mərhələsində uduzub.
DÇ-2022-nin seçmə oyununda evdə Şimali Makedoniyaya 1:2 hesablı məğlubiyyət Bundestimin bir neçə rekordunun qırılmasına səbəb olub.
Komanda Yoahim Lövün rəhbərliyi altında seçmə mərhələlərdə ardıcıl 18 qarşılaşmada qələbə qazanmış və 35 görüşdə (30 qələbə, 5 heç-heçə) məğlub olmurdu.
Almaniya son olaraq 2001-ci ildə DÇ-2002-yə gedən yolda İngiltərəyə 1:5 hesabı ilə uduzub. Komanda daha əvvəl isə mundialların seçmə mərhələlərində 1985-ci ildə Portuqaliyaya məğlub olub - 0:1.
"Səbail"in makedoniyalı legioneri Kadriu Florian Sportinfo.az-a açıqlamasında ölkəsinin millisinin Almaniya üzərindəki tarixi qələbəsindən söz açıb:
"Almaniyanı udmaq böyük bir qələbədir. Onların necə yığma olmasını bilirik. Bu qələbə Makedoniya tarixin ən böyük qələbəsidir.
Makedoniyanın hazırda çox yaxşı komandası var. Ümid edirəm ki, yaxşı nəticələrin davamı gələcək".