!["Qarabağ" bu hücumçunu geri qaytarmaq üçün 2 variantı gözdən keçirir](https://www.sportinfo.az/media/2024/05/18/1715536409_1688622363_musa.jpg)
“Yurqorden”in baş məşqçisi Tomas Laqerlöf növbəti dəfə Musa Qurbanlıya az şans verməsi barədə açıqlama verib.
52 yaşlı mütəxəssis millimizin hücumçusunun bəzi fikirləriylə razılaşmır.
Əvvəl xatırladaq ki, söhbər futbolçunun bu sözlərindən gedir:
“U-21 komandasına göndərilməyimin səbəbi haqda mənə izahat verilməyib. Əlbəttə, bu, onların qərarıdı. Bu barədə danışsalar, yaxşı olardı. Amma heç nə deməmələri də normaldır”.
Baş məşqçi isə vəziyyətin Musaya izah edildiyini deyib:
”Mətbuat konfransında da söylədiyim kimi, bu, rəqabətlə bağlı məsələdi. Oyun üçün heyətə yalnız 20 futbolçu cəlb edə bilərik.
Bizim nəyisə mediadan gizli saxlamaq fikrimiz yoxdur. U-21 də özünü göstərmək üçün şansdı.
Bu komandadakı yaxşı çıxış sizi uğura yaxınlaşdırır. Biz Qurbanlıya belə dedik: istəyirik ki, heyətdə bütün oyunçular oynasın.
Lakin kimisə heyətdən çıxarmalıyıq və belədə rəqabət yaranır. Oyundan-oyuna hər şeyin necə dəyişəcəyi futbolçudan asılıdı.
Məhz hansısa oyunçuya üstünlük vermək düzgün yanaşma deyil. Hər kəs nəticəsiylə mövqeyini gücləndirməlidir”.
Musa yayda “Yurqorden”i tərk edəcək. Klub onun xidmətində maraqlı olanlardan 9-10 milyon İsveç kronu, yəni təxminən 850 min avro tələb edir.
Məbləğ İsveç təmsilçisinin Musa üçün “Qarabağ”a ödədiyi təzminatdan 3-4 milyon kron çoxdur.
Maraq üçün deyək ki, ağdamlılar bu satışdan 500 min avro qazanıb. Amma «köhlən atlılar» onu heç bir ödəmə etmədən geri qaytarmaq istəyir.
Hələlik 1 illik icarə müqaviləsindən söhbət gedir. İsveç klubu buna razılaşmasa, «Qarabağ» sonradan satınalma hüququ ilə icarə variantına baş vuracaq.
Hərçənd Musa Azərbaycana qayıtmağa bir o qədər həvəs göstərmir. Düzünü demək lazımdırsa, bu məsələdə son söz atanın - Qurban Qurbanovundur.
Valideyni nə məsləhət görəcək, gənc hücumçu da bu yolla gedəcək. Bununla belə, Musanın Avropada qalmaq istəyi böyükdür.
Qurbanov da övladının bu niyyətindən xəbərdardır. Odur ki, ata-oğul menecerlər vasitəsilə gələn təklifləri bir-bir incələməyə alıb.
Qitənin təqribən 5-6 ölkəsinin klubundan ona marağın olması bəllidir. Yekun qərar iyun ayına saxlanılıb.
SPORTİNFO.AZ