"Əslində, oyun haqda təəssüratlarım birmənalı deyil. Çünki böyük hesabla qalib gəlsək də, səhvlərimiz çox oldu”.
Sportinfo.az xəbər verir ki, bunu “Neftçi”nin futbolçusu Anton Krivotsyuk deyib.
Milliləşdirilmiş müdafiəçi Azərbaycan Premyer Liqasının X turu çərçivəsində “Qəbələ”yə 4:1 hesabı ilə qalib gəldikləri oyunu şərh edib.
Rəqib qapısından iki top keçirən gənc futbolçu təəssüratlarını klubun rəsmi saytı ilə bölüşüb: “Xüsusilə mən kobud səhvlər etdim. Bununla belə, dubla imza atdım. Dayanmaq istəmirdim, üçüncü qolu da vurmağa çalışırdım”.
Krivotsyukun yeni baş məşqçi Samir Abasovla bağlı suala cavabı belə olub: "Bu məşqçini çoxdan tanıyıram. Əvvəllər onunla işləmişəm.
Ümid edirəm, öz futbol fəlsəfəsini bizim oyuna gətirəcək. Onunla işləmək çox yaxşı və rahatdır. Hələ ən yaxşı oyunumuzu göstərmirik. Zaman keçdikcə buna nail olacağıq”.