DÇ-2022-nin Avropa zonası üzrə seçmə mərhələsində qrup oyunlarının VIII turunun ilk günü başa çatıb.
Sportinfo.az xəbər verir ki, turun ilk günü daha 3 yığmanın Qətər xəyalının üstündən birdəfəlik xətt çəkib.
Söhbət final mərhələsinə birbaşa vəsiqə və pley-off şansı rəsmən bitən komandalardan gedir.
Estoniya və Belarus E, Slovakiya ilə Sloveniya isə H qrupunda ilk iki yerdən birini tutmaq üçün nəzəri şanslarını da itirib. Ancaq digərlərindən fərqli, Sloveniya Millətlər Liqasının pley-offundan yüksəlmək ümidini davam etdirir.
Bununla da seçmə mərhələdən DÇ-2022-yə vəsiqə üçün mübarizə aparan Avropa ölkələrinin sayı 36-ya enib. 55 iştirakçıdan 19-u buradan Qətərə yollanmaq ümidini itirib.
Dünənki 4 uğursuzdan öncə 15 komanda da eyni taleyi yaşamışdı.
Buna qədər A qrupunda Azərbaycan, İrlandiya, B qrupunda Gürcüstan, Kosovo, C qrupunda Litva, D qrupunda Qazaxıstan, F qrupunda Moldova, Farer adaları, G qrupunda Cəbəllütariq, Latviya, H qrupunda Malta, Kipr, I qrupunda Andorra, San Marino və J qrupunda Lixtenşteyn üçün finiş formallığa çevrilib.