Futbolda bəzən ən maraqlı hekayələr uşaq yaşlarından “ulduz”, “super istedad” adlandırılan futbolçular haqqında yazılmır.

Bəzən futbolun ən gözəl tərəfi odur ki, vaxtilə heç kimin böyük ümid bəsləmədiyi bir futbolçu illər sonra hamının diqqətini öz üzərinə çəkir.

Seyxan Fərəcovun hekayəsi məhz belədir.

“İnter” Bakı akademiyasının yetirməsi olan Fərəcov uşaq futbolunda “Rəvan”, “Neftçi”, “AZAL” və “Zirə” kimi klubların formasını geyinib. Lakin heç vaxt “super istedad”, “gələcəyin ulduzu” və ya komandasının əsas ümidi kimi təqdim olunmayıb.

Əksinə…

O, uzun müddət komandalarında daha çox ikinci və ya üçüncü hücumçu statusunda olub. Fiziki baxımdan da diqqət çəkən futbolçu deyildi. Bir qədər kök, çevikliyi və sürəti ilə seçilməyən, haqqında “böyük futbol üçün potensialı yoxdur” düşüncəsi formalaşan uşaqlardan biri idi.

Amma Seyxanın bir xüsusiyyəti var idi:

O, dayanmadı.

Şüvəlanda ilk işıq

“Şüvəlan” FK onu Birinci Divizionda icarəyə götürəndə Seyxanın daxilində yaxşı hücumçuya çevrilə biləcək potensialı ilk dəfə daha ciddi şəkildə gördülər.

Daha sonra “Zirə” və “Qarabağ”ın əvəzedici komandalarında çıxış etdi.

Məhz “Qarabağ”ın əvəzedici komandasında artıq rəqəmlər danışmağa başladı. Seyxanın qolları artdı, özünəinamı yüksəldi və o, tədricən “sadəcə heyətdə olan hücumçu” statusundan çıxmağa başladı.

Sonra isə “Qaradağ Lökbatan” mərhələsi gəldi.

Orada Seyxan artıq özünü bombardir kimi göstərdi. Komandanın çempionluq uğrunda mübarizəsində əsas fiqurlardan birinə çevrildi. Çempionluq əldən qaçdı, amma Fərəcov öz adını Birinci Divizionun məhsuldar hücumçuları sırasında yazdırdı.

İmişli ilə Premyer Liqaya yüksəldi, amma Premyer Liqada ona yer tapılmadı

Növbəti dayanacaq “İmişli” oldu.

Seyxan burada da komandanın Premyer Liqaya yüksəlməsində mühüm rol oynadı. Komanda məqsədinə çatdı.

Lakin ən paradoksal məqam bundan sonra baş verdi.

“İmişli” Premyer Liqaya çıxdı, amma Seyxan Fərəcov Premyer Liqada komandada qalmadı.

Bir çox futbolçu üçün bu məqam son nöqtə ola bilərdi.

Seyxan üçün isə yeni başlanğıc oldu.

O, “ORDU” klubuna keçdi və Birinci Liqada mövsümü bombardir kimi başa vurdu.

18 qol.

Bu rəqəmin nə qədər ciddi olduğunu göstərmək üçün başqa bir statistika kifayətdir:

“ORDU” bütün mövsüm ərzində cəmi 35 qol vurdu.

Yəni Seyxanın 18 qolu komandanın bütün qollarının təxminən 52 faizini təşkil etdi.

Başqa sözlə, “ORDU”nun vurduğu hər iki qoldan biri demək olar ki, Seyxanın ayağından gəlirdi.

026/2027: nəhayət, Premyer Liqa debütü

Və futbolun yazılmamış qanunlarından biri burada özünü göstərdi.

Seyxan geri qayıtdı.

2026/2027 mövsümündə Fərəcov yenidən “İmişli”yə qayıtdı.

Bu dəfə isə artıq fərqli statusda.

Bir vaxtlar “İmişli” ilə Premyer Liqaya yüksələn, lakin özü elitada oynamaq şansı əldə edə bilməyən Seyxan Fərəcov illər sonra həmin komandanın heyətində Premyer Liqada debüt etdi.

Yəni onun illər əvvəl yarımçıq qalan hekayəsi nəhayət davamını tapdı.

Və bəlkə də futbolun ən gözəl tərəfi elə budur:

Sənə vaxtında verilən şans yoxdursa, özün həmin şansı yaratmalısan.

Və "Şəfa" qarşısında qələbə gətirən futbolçu

Bu gün isə Seyxan Fərəcov “İmişli”nin “Şəfa” ilə oyununda komandasına qələbə qazandıran futbolçulardan biri oldu.

Bir vaxtlar haqqında “zəifdir”, “fiziki cəhətdən hazır deyil”, “böyük futbol üçün potensialı yoxdur” deyilən futbolçu bu gün Premyer Liqada özünü göstərir.

Və burada daha bir vacib detal var.

Seyxanın hekayəsi yalnız bir qol və ya bir qələbə haqqında deyil.

Bu, futbolçunun öz üzərində illərlə işləməsinin hekayəsidir.

Başqaları mövsümlərarası fasilədə istirahət edərkən, Seyxan fərdi məşqçilərlə işləyir, fiziki hazırlığını artırır, bədənini dəyişir, sürətini və gücünü inkişaf etdirir.

Çünki bəzi futbolçulara istedad qapını açır.

Bəzilərinə isə həmin qapını illərlə döymək lazım gəlir.

Seyxan ikinci qrupdandır.

Bəlkə də növbəti addım – Milli komanda?

Azərbaycan millisinin hücum xəttində yer uğrunda mübarizə aparan futbolçuların fonunda Fərəcovun hekayəsi xüsusilə diqqətçəkəndir.

Əlbəttə, bir neçə turdan sonra milliyə çağırış barədə danışmaq tezdir. Bir futbolçu yalnız davamlı nəticələr, sabit performans və yüksək səviyyədə özünü təsdiq etdikdən sonra bu müzakirənin real iştirakçısına çevrilə bilər.

Amma “İmişli”nin GPS göstəriciləri, Fərəcovun fiziki hazırlığı, qol statistikası və meydandakı effektivliyi nəzərə alındıqda, onun adını izləmək artıq məntiqli görünür.

Əgər Seyxan bu tempdə davam etsə, Azərbaycan millisinin baş məşqçisi Ayxan Abbasovun diqqət yetirməli olduğu hücumçulardan birinə çevrilə bilər.

Çünki bəzən milli komandaya yeni sima gətirmək üçün uzağa baxmağa ehtiyac yoxdur.

Bəzən həmin futbolçu illərlə gözümüzün qarşısında olur.

Sadəcə, biz onun hekayəsini görməmişik.

Seyxan Fərəcovun hekayəsi istedad haqqında deyil.

Bu, əmək, inad, səbr və hər gün özünü əvvəlkindən daha yaxşı etməyə çalışan bir futbolçu haqqında hekayədir.

Vaxtilə “ikinci hücumçu” sayılan, haqqında böyük ümidlər bəslənilməyən, fiziki görünüşünə görə tənqid olunan həmin uşaq bu gün Premyer Liqanın ilk turlarının diqqətçəkən adlarından birinə çevrilib və illər sonra nəhayət elitada debüt edib.

Və onun hekayəsində ən böyük mesaj bəlkə də budur:

Futbolda istedad səni başlanğıca gətirə bilər. Amma səni zirvəyə aparan şey – zəhmətdir.

Seyxan Fərəcov isə hələ yolun başlanğıcındadır.

SPORTİNFO.AZ