“Hesab edirik ki, idman prinsipləri baxımından da ən doğru qərar “Ağstafa Gəncləri”nin II Liqaya buraxılmasıdır”.
Bu sözləri Sportinfo.az-a açıqlamasında Peşəkar Futbol Liqasının (PFL) texniki-idman direktoru Elgiz Abbasov deyib.
PFL mənsubu “Qusar”ın yarışdan kənarlaşdırılması, Region Liqasının bürünc medalçısı “Ağstafa Gəncləri”nun onların yerinə buraxılmasının səbəbi haqda danışıb:
“Yeni mövsümdən öncə biz II Liqa klublarından iştiraklarının təsdiqi ilə bağlı rəsmi cavab istədik. “Qusar”dan heç bir cavab almaq mümkün olmadı.
Eyni zamanda, klub tərəfindən ötən mövsümlərdə Əsasnamə tələblərinin kobud şəkildə pozulması səbəbindən Qusarın Liqadan kənarlaşdırılması qərara alındı.
Bu mövsüm II Liqada 4 yeni komanda mübarizə aparacaq. Onlardan biri I Liqadan düşən “Qaradağ Lökbatan”dır.
Digər üç kollektiv isə Region Liqasından yüksəlib. “Xankəndi” Region Liqasının çempionu, “Şirvan” pley-offun qalibi kimi yüksəlib. Nəhayət, “Ağstafa Gəncləri”3-cü yerin sahibi olduğu üçün II Liqaya buraxıldı.
Bir yerə bir neçə müraciət var idi. Biz II Liqaya maraq göstərən bütün Region Liqası klublarına təşəkkür edirik.
Konkret “Ağstafa Gəncləri”nə gəlincə, bu klub Region Liqasında üçüncü pillənin sahibi olub”.
