Azərbaycan II Liqasında XX turun oyunları keçirilir.

Çempionluq uğrunda mübarizə aparan "Füzuli" Bakıda "Şəki Siti"ni qəbul edib.

Hesabı 17-ci dəqiqədə Emin Quliyev açıb. Bir qədər sonra qonaqlardan Sərcan Omarov bərabərlik qolunu vurub.

42-ci dəqiqədə isə Tural Məmmədzadə müdafiəçilərlə mübarizədən qalib ayrılaraq, şəkililəri önə çıxarıb.

Bu, oyunda son qol olmayıb. Emin Quliyev 73-cü dəqiqədə dublunu rəsmiləşdirərək, nominal ev sahiblərini məğlubiyyətdən xilas edib.

Ümumi götürsək, 98 dəqiqə sürən qarşılaşma qol epizodları sarıdan bol olub. Xüsusən «Fuzuli»nin yaratdığı təhlükəli epizodları qeyd etməliyik.

Oyunu izlərkən, görünən bu idi ki, onlar var qüvvəsi ilə mübarizə aparmır. Vurduqları qollara da bir o qədər sevinmirdilər.

Sanki kiməsə və nəyə xatir meydana çıxmışdılar və əvvəlki kimi istəkli təsir bağışlamırdılar. Matçın xeyli bölümünü gəzərək keçirdilər.

Bu da təsdiqləyir ki, komandada müəyyən problemlər mövcuddur və Nadir Əliyev boş yerə baş məşqçi postundan ayrılmayıb.

Əgər «Füzuli»ni ikinci yerə gətirib çıxaran mütəxəssis vəzifəsindən istefa veribsə, bunun ən böyük səbəbi elə maliyyə ilə bağlı ola bilər.

Deməli, rəhbərlik kollektiv qarşısında götürdüyü maddi öhdəliklərini yerinə yetirməyib ki, Əliyev burada qalmağa lüzum görməyib. Yoxsa yaxşı nətixələr qazanan çalışdırıcı durduğu yerdə niyə çıxıb getsin ki..?

Xallarını 43-ə yüksəldən "Füzuli" turnir cədvəlinin 2-ci pilləsində qərarlaşıb. 32 xalı olan "Şəki Siti" isə 6-cı yerdədir.

SPORTİNFO.AZ