II Liqada XIX tur başa çatıb.

Baş məşqçi dəyişikliyinə gedən "Şahdağ Qusar" Şamaxıda "Lerik"i qəbul edib.

Bəhram Şahquliyevlə vidalaşan komandanı İlkin Hacıxanovun meydana çıxardığına dair protokolda qeyd olunsa da, gerçəkdə bu işi Əlimirzə Daşzərini görüb.

32 yaşlı müdafiəçi sonadək texniki zonada qalaraq, debütünü qələbə ilə «yuyub».

Oyunu izləyənlər təxmin eləməzdi ki, 90 dəqiqə ərzində cəmi 3 qol vurular. İstər «Şahdağ», istər «Lerik» fərqlənmək üçün xeyli imkan yaxalayıb.

Çempionatın bombardiri Tural Qürbətov ilk hissədə penaltini qaçırıb. Əvəzində Pənci Ağazadə təqribən 25-28 metr məsafədən vurduğu əla zərbəylə qusarlıları «soyuq duş»a qonaq edib.

Ağazadənin qolunu izlədikdə, əmin olursan ki, II Liqada həqiqətən maraqlı futbolçular var və onların sayı heç də bir əlin barmaqları ilə məhdudlaşmır.

«Şahdağ» fasilədən qayıdar-qayıtmaz oyunun «çarx»ını öz xeyrinə dəyişir. Öncə Tural kuryoz alınan epizodda toru silkələyərək, qollarının ümumi sayını 23-ə çatdırır.

1 dəqiqə sonra Famil Camalov müdafiəçiləri qabaqlayaraq, adını tabloya yazdırır.

Bu görüşü qapıçıların dueli də adlandırmaq olar. Rafiq Kərimovla Hafiz Məmmədli bir-birindən maraqlı seyvlərlə yadda qalır.

Xallarını 38-ə yüksəldən "Şahdağ Qusar" turnir cədvəlinin 4-cü pilləsində qərarlaşıb. 16 xalı olan "Lerik" isə 11-ci yerdədir.

SPORTİNFO.AZ