Premyer Liqanın 3-cü turunun açılış matçında “Sumqayıt” doğma meydanında “Şamaxı”nı qəbul edəcək.
Bu komandalar arasındakı matçlar hər zaman prinsipiallığı ilə fərqlənib.
Bu əfəki görüş isə kifayət qədər gərgin keçəcək.
Meydanın bir tərəfində “Kəpəz”lə “Qarabağ”ı məğlub edərək turnir cədvəlinin ilk pilləsində qərarlaşan “kimyaçılar”, digər tərəfində ötən həftə “Sabah”dan üzücü məğlubiyyət alan “şirlər” dayanacaq.
Sportinfo.az-a açıqlama verən “Sumqayıt”ın israilli yarımmüdafiəçisi Roy Kehat matçla bağlı fikirlərini bölüşüb:
“Çox yaxşı komandaya qarşı oynayacağıq. “Şamaxı”nın oyun intizamını çox bəyənirəm.
Meydanda nə etmək lazım gəldiyini bilir və buna uyğun addım atırlar.
Ötən mövsümü xatırlayıram, dörd oyunun üçündə “Şamaxı”ya uduzmuşduq.
İlk iki turda qalib gəlməyimiz bizi arxayınlaşdıra bilməz. Bu dəfə daha aqressiv və daha hərəkətli olmalıyıq.
Əks halda, rəqib bizi cəzalandıra bilər. Necə ki, “Neftçi” kimi rəqibə səfərdə uduzmadılar.
Uğurlu seriyanı davam etdirməyə çalışacağıq. Lakin bu dəfə işimiz bir qədər çətin olacaq”.
Avqustun 29-da Sumqayıt şəhər stadionunda baş tutacaq görüş saat 18:30-da start götürəcək.
HƏBİB
