Yeni yaranan “Difai” Region Liqasında ilk oyununa çıxıb.
Əsasən Vətən Müharibəsi iştirakşıları və qazilərindən formalaşdırılan klub çempionatın ilk turunda “Cürət”in qonağı olub.
Bu görüşdə 1 qazi və 6 veteran “Difai”nin formasını geyinib. "Tarixi yaşadaraq, tarix yazan fədailərin komandası” devizi ilə yola çıxan kollektiv 10:2 hesabıyla qalib gəlib.
Qarabağ döyüşlərində ermənilərə qarşı vuruşmuş Eşqin Tağıyev – pokerə imza atıb. Gülalı Mehrəliyev dubl edibsə, Oruc Məmmədov, Mirkamil Əliyev, İsmayıl Məmmədov, Coşqun Qorçiyev hərəyə 1 dəfə fərqlənib.
Qarşılaşma “ASK Arena”nın 4-cü meydançasında keçirilib. “Cürət” oyunun saat 15:00-da start götürməsi barədə AFFA-nı öncədən məlumatlandırsa da, görüş nəzərdə tutulduğu vaxtda başlamayıb.
Həmin saatda burada aşağı liqaların oyunları davam etdiyindən, Region Liqasının iştirakçıları yalnız 16:00-dan sonar meydana daxil ola bilib.
Işıqlandırma sistemi olmadığı üçün oyunda fsilə elan edilməyib. Komandalara istirahət üçün cəmi 2-3 dəqiqə vaxt verilib. Matçın son bölümü isə qaranlıq hava şəraitində keçib.
SPORTİNFO.AZ