Rusiya mətbuatı "Astana"dan ayrılan Roman Qriqorçukun Azərbaycan millisinin başına keçə biləcəyi haqda iddia ilə çıxış edib.
Xəbərdə ukraynalı mütəxəssinin uzun müddət işsiz qalmayacağı və AFFA ilə danışıqlar apardığı qeyd olunub.
Qriqorçuk yanvarın 13-də "Astana"dan ayrılıb. O, ötən mövsüm komandası ilə Qazaxıstan çempionu adını qazanmışdı.
Bu gün “qafqazinfo”ya danışan "Qəbələ"nin sabiq çalışdırıcısı hələ ki, məsələ barədə danışmaq istəmədiyini bildirib: “Hazırda fasilədir və bu barədə fikir bildirmək istəmirəm. Fikrimcə, mövzu haqqında indi danışmaq doğru deyil”.
Sportinfo.az-ın məlumatına görə, Qriqorçuk həqiqətən AFFA-ya təklif olunub. Amma tərəflər danışıqlar masası arxasına keçməyib.
Çünki federasiya daha tanınmış mütəxəssis sorağındadır və onların bir neçəsiylə görüşülüb.
Üç il Premyer Liqada çalışması və Azərbaycan futboluna yaxından bələd olması Qriqorçuk üçün üstünlük sayılsa da, xarakterindəki çətinliklər, başqa sözlə, problemli məşqçi gözündə görülməsi AFFA-nın onun namizədliyini ciddiyə almamasını şərtləndirib.