“Yuventus”un baş məşqçisi Mauritsio Sarri hücumçuları Kriştiano Ronaldonun hazırkı durumunu şərh edib.

Dünən A seriyasının “Leççe”yə qarşı oyununda (4:0) portuqaliyalı penaltidən qol vurub və 2 qolun ötürməsini verib.

Sportinfo.az xəbər verir ki, matçdan sonra keçirilən mətbuat konfransında Sarri 35 yaşlı oyunçuya istirahətin verilməsinin mümkünlüyü barədə sualı belə cavablandırıb:

“Hazırda o, sabit oynamağa qadirdir. Hər oyundan- oyuna Ronaldonun forması daha da yaxşılaşır. Ola bilər ki, yorulub. Amma oynamaq onun xoşuna gəlir.

Əlbəttə, uzaq perspektivdəki bir neçə matçda Ronaldoya istirahət lazım olacaq. Zamanı gələndə, o, istirahətin ona vacib olduğunu başa düşəcək”.

İtaliya KİV-ləri Sarrinin Ronaldoya istirahət vermək fikrində olduğunu yazıb. Əlavə edək ki, portuqaliyalı hücumçu bu mövsüm A seriyasında 24 oyun keçirib və 23 qol vurub.