Mövsümün ilk yarısını "Qarabağ"da keçirən "Bornmut"un qapıçısı Asmir Beqoviç bu yanvar icarəyə getdiyi "Milan"ın oyunlarını hələlik kənardan izləyir.
Sportinfo.az xəbər verir ki, İtaliya nəhənginin baş məşqçisi Stefano Pioli İtaliya kubokunun SPAL-la oyunundan əvvəl zədələnən əsas qapıçı Canluici Donnarummanın yoxluğunda da bosniya və herseqovinalı qolkiperə etimad göstərmədi.
"Qara-qırmızı" klub dünən İtaliya A Seriyasında növbəti görüşünü keçirib. Beqoviçin adı bu dəfə də oyunun iştirak ərizəsinə salınıb, lakin o, komandasının zəfərini kənardan izləyib. Səfərdə autsayder-debütant "Breşia"nı 1:0 məğlub edən milanlılar xal ehtiyatını 31-ə çatdıraraq turnir cədvəlindəki mövqelərini də bir qədər yaxşılaşdırıblar.
2020-ci ildə uduzmayan "rossyonerlər" kubok matçı da daxil, ardıcıl 4 oyundur qələbə qazanırlar.