COP29

"Klubun bizə bir neçə aylıq borcu var, buradan ayrılacam"

23 May 01:20 Bizimkilər 2 460
"Klubun bizə bir neçə aylıq borcu var,  buradan ayrılacam"

Sportinfo.az xəbər verir ki, Azərbaycan millisinin “Tuzlaspor”da forma geyinən futbolçusu Bəxtiyar Həsənalızadə “report”a müsahibə verib.

Müdafiəçi komandasının Türkiyə I Liqasında uğursuz çıxış edərək II Liqaya düşməsinin səbəblərindən, həmçinin qarşıdakı planlardan danışıb.

- Son mövsümü necə dəyərləndirərdiniz?

- Aşağı liqaya düşməyimizin səbəbini mövsümün əvvəlində itirdiyimiz xallarla əlaqələndirərdim. Ardıcıl 4 oyunda uduzduq. Bunun böyük təsiri oldu. Sonradan toparlandıq, komanda şəklində yaxşı çıxış etdik. 11 oyunda məğlub olmamağımıza baxmayaraq, liqada qala bilmədik. Turnir cədvəlinin sonuncu yerlərində qərarlaşan klublar arasında ən yaxşı vəziyyətdə olan biz idik. Lakin gözlənilmədən heç-heçə oynadıq, digər rəqiblərimiz isə qələbə qazandılar.

- Klubdan tamamilə ayrıldığınızı düşünmək olarmı?

- Rəhbərliklə bu barədə rəsmi danışığımız olmayıb. Ancaq görünür, yollarımız ayrılacaq. Çünki aşağı liqada legionerə icazə yoxdur. Heç klub da dəvət göndərməz.

- Legioner məsələsi olmasa, “Tuzlaspor”da qalıb oynayacaqdınız?

- Təbii ki, aşağı liqada oynamaq istəməzdim. Klubla "1+1 il" şərti ilə müqavilə bağlamışdım. İstəsəydilər, məcburən qalacaqdım.

- “Tuzlaspor”da maliyyə problemlərinin olduğu deyilir.

- Ciddi maliyyə problemləri deyildi. Maaş gecikməsi olurdu. Düzdür, bəzi klublarda tam ödəniş olmur. Dəfələrlə azərbaycanlı futbolçuların da başına gəldiyini eşitmişəm. Demək olar ki, mövsüm boyu maaş almayıblar. Son bir neçə ay üçün klubun bizə borcu var. Yəqin ki, bununla bağlı müraciət olunacaq.

- Ümumiyyətlə, “Tuzlaspor”da mövsümün əvvəlində qarşıya hansı hədəflər qoyulmuşdu?

- Komanda haqqında ətraflı məlumatım yox idi. Amma müəyyən informasiyalar öyrənmişdim. Mənim üçün ölkə xaricində oynamaq baxımından yeni macəra, addım idi. Açığı, mənim üçün komandanın mövqeyi vacib deyildi. Pis başa düşülməsin, Türkiyənin I Liqası Azərbaycan Premyer Liqasından heç də geri qalmır. Hətta bəzi cəhətlərdə üstündür. Səviyyə baxımından geri qalmırlar.

- Klubun şəraiti, infrastrukturu necə idi? Siz harda yaşayırdınız?

- Sancaktəpədə yerləşmişdik. Klubun oyunları keçirdiyi stadionun yaxınlığıda kirayə tutdğum evdə qalırdım. Bütün xərclər “Tuzlaspor” tərəfindən qarşılanırdı. Düzdür, komanda Tuzlanı təmsil edir. Amma şəhərdəki stadion süni örtüklü olduğuna görə oyun keçirməyə icazə verilmirdi. Bu səbəbdən Sancaktəpədəki stadionu kirayə götürmüşdülər. Həm məşqlərimizi, həm də oyunlarımızı orada keçirirdik.

- “Tuzlaspor”dakı çıxışınızı necə dəyərləndirirsiniz?

- Hər halda, uğurlu alındığını düşünürəm. Bəzən zədələr oynamağıma mane oldu. Daha çox oynaya bilərdim. Buna baxmayaraq, 20 matçda meydana çıxdım, 1 qol və 1 məhsuldar ötürmə müəllifi oldu. Tanımadığım liqa idi, komandaya uyğunlaşmaq üçün vaxta ehtiyac olur. İlk 4 oyunda meydana çıxmadım. Sonra oynamağa başladım, uyğunlaşma prosesi təxminən 1 ay çəkdi.

- Karyeranızla bağlı planlarınız necədir? Azərbaycanda oynamaq, yoxsa yenidən legioner həyatı yaşamaq istəyirsiniz?

- Hələ ki, qərar verməmişəm. Həm bizim çempionatda, həm də Türkiyədə mövsüm bitməyib. Onlarda pley-off oyunları başlayıb. "Transfer pəncərəsi" də açılmayıb. Dincəlirəm, ailəmlə vaxt keçirməyə çalışıram. Hər şey təkliflərdən asılı olacaq. Menecerlərlə əlaqə saxlayıram.

- Təkliflər var?

- Həm Azərbaycandan, həm də Türkiyədən maraqlananlar var. Amma klubların adlarını çəkmək istəmirəm. Yəqin ki, bir neçə həftədən sonra məlum olacaq. Hazırda gözləmə mövqeyindəyəm.

- Azərbaycan Premyer Liqası ilə bağlı düşüncələriniz necədir?

- Ümumilikdə çox böyük dəyişiklik hiss olunmur. “Qarabağ” çempionluğu vaxtından əvvəl təmin etdi. Düzdür, bu, “Qarabağ” üçün əladır. Amma Azərbaycan futbolu üçün dörd-beş həftə əvvəldən qazanılan çempionluq maraq doğurmya bilər. Digər yerlər uğrunda gedən mübarizə həqiqətən maraqlıdır. Oyunları izləyirdim, son tur olmasına baxmayaraq, intriqa qalıb. Komandalar xal baxımından bir-birilərinə çox yaxındırlar.

- Son turla bağlı proqnozlarınız necədir?

- Bəlkə də ikinci yerin taleyi “Neftçi” və “Sabah” matçından asılı olacaq. Amma “Zirə” və “Sumqayıt” da var.

- Azərbaycan millisinin baş məşqçi postu da boşdur…

- Futbolçu kimi bu haqda nəsə deməyim düzgün olmaz. Qərar verən insalar var. Bizim vəzifəmiz odur ki, millidə canla-başla oynayaq.

Digər Xəbərlər
Xəbər Lenti
18 İyun 20:10 Çək və bizə göndər!
18 İyun 11:30 Gərək belə olsun…