Azərbaycan millisinin və “Kayzerslautern”in futbolçusu Mahir Emreli zədəsini sağaldaraq yaşıl meydanlara qayıtması barədə danışıb.
Sportinfo.az xəbər verir ki, 28 yaşlı hücumçu 3 aylıq fasilədən sonra II Bundesliqanın 23-cü turu çərçivəsində "Proyssen Munster"lə səfər matçının 88-ci dəqiqəsində meydana daxil olub.
O, görüşdən sonra açıqlamasında deyib:
"Mənim üçün çətin bir dövr idi. Əvvəla, son bir neçə ay ərzində bərpa müddətində mənə kömək edən və dəstək olan hər kəsə təşəkkür etmək istəyirəm.
İndi özümü 85-90 faiz formada hiss edirəm və motivasiyam 100 faizdir. Bu mövsüm daha çox dəqiqə oynamaq və daha çox qol vurmaq istəyirəm".
Emreli 2025-ci ilin 8 noyabrında “Herta”ya qarşı Almaniya 2-ci bundesliqasının matçında zədə alıb və o vaxtdan oyunlardan kənarda qalmışdı.
28 yaşlı hücumçu bu mövsüm “Kayzerslautern”də 5 oyunda meydana çıxıb və 1 qol vurub.
