.jpg)
«Sumqayıt»ın Futbol Akademiyasının baş koordinatoru Hakan Sünal Azərbaycanı tərk edəcək.
Sportinfo.az-ın məlumatına görə, o, iyunun 27-də Almaniyaya qayıdacaq,
Bakı-İstanbul reysinə bilet alan türkiyəli funksioner oradan Frankfurta yollanacaq. Sünalın «Sumqayıt»la müqaviləsinin başa çatmasına hələ 7 ay qalıb.
Amma ola bilsin, bu gediş birdəfəlik olsun. Onun geri dönüb-dönməməsi AFFA-nın növbəti qərarlarından asılıdır. Əgər federasiya aşağı yaş qrupları üzrə ölkə çempionatını sentyabrda bərpa etsə, Sünal işinin başına qayıdacaq.
Qurum yarışların startını dekabradək ertələsə, onda buna ehtiyac qalmayacaq. 2019-cu ilin əvvəlində «Ayntraxt»dan dəvət olunmuş A kateqoriyalı mütəxəssisin «Sumqayıt»da qalması həm də irəli sürəcəyi yeni maliyyə şərtlərindən asılıdır.
Maliyyə çətinlikləri yaşayan «gənclik şəhəri» təmsilçisi Sünalın xərclərini qarşılaya biləcəkmi? Hazırda bu, bir qədər sual altındadır.
