“Bizim aldığımız maaş bu aydan o biri aya zorla çatır”

14 Aprel 00:38 Sumqayıt 545
“Bizim aldığımız maaş bu aydan o biri aya zorla çatır”

Biz hər nə qədər futboldan danışsaq və yazsaq da, meydanda söz sahibi futbolcular və bir qədər də dərinə getsək, kapitanlardır.

Məhz onlar rəhbərlik, baş məşqçi ilə kollektiv arasında körpü rolunu oynayır, lazımi anlarda söz sahibi kimi çıxış edirlər.

Ölkə futbolundakı məcburi fasiləni nəzərə alıb, bu gündən yeni layihəyə - “Kapitanla söhbət” – start veririk. İlk qonağımız artıq 7 ildi “Sumqayıt”ın şərəfini qoruyan, komandanın “ağsaqqallarından” sayılan Vurğun Hüseynovdu.

- Karantin dönəmini harda və neçə keçirirsən? Futbolsuz darıxmırsan?
- Karantin günlərində ailə üzvlərimlə bir yerdə oluram. Fiziki hazırlıq üzrə maşqçimiz Edu onlayn məşqlər keçir, biz də evdə ona baxıb hərəkətləri təkrarlayırıq. Futbolsuz qalmaq, doğrudan da, çətindi. Amma bacardığım qədər orqanizmimi tonusda saxlamağa çalışıram.

- Peşəkar komandanın kapitanı olmaq nə deməkdi?
- Kapitan kapitandı - fərqi yoxdu o peşəkar komandada bu funksiyanı yerinə yetirir, yoxsa hansısa həvəskar kollektivdə. O, bu şərəfə layiq görülübsə, deməli, meydanda və yaxud paltardəyişmə otağında daha məsuliyyətli olmalı, davranışı, danışığı ilə “qızıl orta”nı tapmalıdı. Kapitan elə etməlidi ki, futbolçular da, məşqçilər korpusu da ona inansın, güvənsin. Bir də kapitan çətin anlarda komandanı toparlamağı bacarmalı.

- Vurğun bunu bacarır?
- Bu suala komanda yoldaşlarım və rəhbərliyi altında oynadığım məşqçilər daha dəqiq cavab verə bilərlər. Məncə, pis-yaxşı bu işin öhdəsindən gəlirəm ki, artıq neçə illərdi “Sumqayıt”ı meydana məhz mən kapitan kimi çıxarıram. Onu da deyim ki, bu gün “Sumqayıt”da kapitan sarğısını qoluna taxmağa layiq oyunçular var. Rail Məlikov, Şəhriyar Əliyev bu missiyanı yerinə yetirməyə layiq, təcrübəli oyunçulardı.

- Heyətdə yerli oyunçu ola-ola, kapitan sarğısını legionerə vermək nə dərəcədə düzdü?
- Bu məsələyə hərə bir cür yanaşır. Bilirəm ki, çoxları yerlilər olan yerdə kapitan sarğısını əcnəbinin daşımasına o qədər də yaxşı baxmır. Ancaq fikrimcə, kapitanın yerli və ya legioner olması o qədər də əhəmiyyət daşımır. Vacib olan həmin futbolçunun kollektiv tərəfindən qəbul olunmasıdı. Bir də kapitanın çox təcrübəli, “istidən-soyuqdan keçən” biri olması vacibdi. Təbii ki, liderlik və insani keyfiyyətləri də bu məsələdə həlledici rol oynayır.

- Artıq bir aya yaxındı çempionat matçları məlum səbəbdən təxirə salınıb. Nə vaxt başlayacağı da məlum deyil. Əksər oyunçuların da müqavilə müddəti may-iyunda bitir. Son 8 turun görüşlərinin iyul və ya avqustda keçirilməsinə qərar verilsə, müqavilə müddəti bitən oyunçular bununla razılaşarlar?
- Artıq 7-ci ildi “Sumqayıt”ın şərəfini qoruyuram. Bu klubdan qazandığım pulla ailəmi dolandırıram. Öz adımdan deyə bilərəm ki, həmişə kömək etməyə hazıram.

- Bəs komanda yoldaşların, xüsusilə də kənardan dəvət olunanlar necə? Heç bu haqda aranızda söhbət olub?
- Hələ ortada konkret qərar olmadığından heç kimlə bu haqda söhbətim olmayıb. Fikrimcə, onlar da mövsüm bitənə qədər qalıb kömək edəcəklər. Komanda yoldaşlarımı yaxından tanıdığım üçün onlara arxayınam.

- Karantin dönəmində rəhbərliklə, baş məşqçi ilə danışmısan?
- Sözün düzü, yox. Dediyim kimi məşqçilər korpusundan yalnız fiziki hazırlıq üzrə mütəxəssimiz Edunu hər gün onlayn məşqdə görürəm. Karantindəyik deyə, indi hamı futbolu yox, sağlamlığını düşünür. İnşallah, virus ölkəmizdən təmizlənər, karantin götürülər və biz də yenidən bir araya gələrik.

- Çempionatların təxirə salınması Avropanın əksər klublarına maliyyə baxımından ciddi ziyan vurub. Bunu nəzərə alan klub rəhbərləri futbolçulara maaşların azaldılması ilə bağlı müraciət ediblər. Bəziləri bununla razılaşır, bəziləri isə razılaşmır. “Sumqayıt” rəhbərliyi sizə belə müraciət ünvanlasa, cavabınız nə olar?
- Açığı, Avropa klubları ilə bizi müqayisə etmək gülünc olardı. Siz dediyinizi büdcəsi yüzmilyonlarla ölçülən, futbolçusu mövsümə milyonlar qazanan klublara şamil etmək olar. Bizim aldığımız maaş bu aydan o biri aya zorla çatır. Mən “Sumqayıt”ı nəzərdə tuturam. Bilirsiz ki, bu gün premyer-liqada ən aşağı büdcə bizim klubdadı və futbolçuların əməkhaqqısı yüksək deyil. Rəhbərliyin maaşların azaldılması ilə bağlı bizə müraciət edəcəyinə inanmıram.

- Səncə, çempionatın qalan 8 turu keçirilməlidi, yoxsa indiki turnir cədvəlindəki durumla mövsümü başa vurmaq daha məqsədəuyğundu? Onu da nəzərə al ki, belə olacağı təqdirdə “Sumqayıt” avrokuboklara vəsiqə qazanacaq.
- Mənə qalsa, çempionatı qaldığı yerdən davam etdirmək daha yaxşı olar. İstəmirəm sabah kimlərsə desin ki, “Sumqayıt” kağız üzərindəki nəticələr hesabına avrokuboklara vəsiqə qazandı. İnşallah, çempionat bərpa olunar və biz də alın tərimizlə qazandığımız vəsiqə ilə qitəmiqyaslı turnirə qatılarıq. Hər halda, istəmərəm ki, karyeramı başa vurandan sonra güzəşt sayəsində avrokublara yollanmış komandanın futbolçusu kimi xatırlanım. İllər sonra heç kim bunu yada salmasa da, siz jurnalistlər hər dəfə bunu qeyd edəcək, bizə əziyyətsiz avrokubok iştirakçısı olduğumuzu xatırladacaqsız (gülür). Qismətimizdə bu varsa, qoy idman mübarizəsində buna nail olaq.

- Sabah artıq bir ay olacaq ki, məşqlərdən uzaq düşmüsüz. Bir futbolçunun yenidən optimal formaya düşməsi üçün nə qədər vaxt tələb olunur?
- Uzun fasilədən sonra bir futbolçunun əvvəlki formasını, heç olmasa, 50 faiz bərpa etmək üçün minimum 3 həftə vaxt tələb olunur. Çünki sən nə qədər tək məşq etsən də, kollektiv hazırlığın yerini doldura bilməzsən. Özünüz də görürdüz ki, yayda təşkil olunan 45 günlük təlim-məşq toplanışından, 3-5 çempionat matçından sonra futbolçu istədiyi formaya düşür. İndki məcburi istirahətdən sonra bütün komandalara çətin olacaq. Fikrimcə, toplanış üçün 5 həftə vaxt ayrılsa və 2-3 yoxlama görüşü keçirsək, premyer-liqada normal çıxış edə bilərik (Futbol+).

Xəbər Lenti
24 May 11:00 Ağdamdan Ankaraya...