I Divizionda danışılmış oyunlara həsr olunmuş araşdırmanın növbəti mərhələsi "Sumqayıt"ı "haqlayıb".
Sportinfo.az-ın məlumatına görə, UEFA-nın AFFA-ya göndərdiyi son serkulyar məktubların birində "kimyaçılar"ın əvəzedici heyətinin adı keçib.
Avropanın ali futbol təşkilatı "Sumqayıt-2"nin "Kəpəz"lə səfər oyununa külli miqdarda pul qoyuluşu edilməsi haqda AFFA-nı məlumatlandırıb. Söhbət sentyabrın 13-də Gəncədə keçirilən və 1:1 bitən qarşılaşmadan gedir.
Redaksiyamıza daxil olan informasiyaya görə, UEFA-nın təqdimatından sonra "Sumqayıt"da araşdırma aparılıb. 4 futbolçu sorğu-suala cəlb edilib.
Komanda üzvləri matçın nəticəsinin öncədən razılaşdırılması haqda təklif aldıqlarını sonda gizlətməyiblər. Qəribədir ki, klub rəhbərliyi onları 50 manat cərimələməklə işini bitmiş sayıb.
AFFA son 1 ayda Azərbaycan "futbol ailəsi"nin 38 üzvünü "qara siyahı"ya salıb. Birinci divizionda çıxış edən “Ağsu“, “Turan-Tovuz“, “Neftçi-2”, ”Zirə-2”, MOİK və “Binə”nin bir neçə oyununda qeydə alınmış şübhəli məqamlarla əlaqədar AFFA-nın nəzdində fəaliyyət göstərən danışılmış oyunlarla bağlı xüsusi komissiyanın və ekspertlərin apardığı araşdırmaya, həmçinin UEFA-dan quruma daxil olan məlumatlara əsasən, klubların futbolçuları və digər futbol funksionerləri, o cümlədən, futbolda hər hansı fəaliyyəti olmayan şəxslərin nəticəsi manipulyasiya olunmuş oyunlarda iştirakı müəyyən olunub.