"Sumqayıt"ın yarımmüdafiəçisi Əmir Ağayev Sportinfo.az-a müsahibə verib.
- Qışda sizinlə birlikdə "Sumqayıt"a keçən Əli Babayev ötən mövsümün sonunda komandadan ayrıldı. Yaxın dost olduğunuzu bilirik. Onun gedişinin əsl səbəbini bəlkə siz açıqlayasız...
- Mən də dəqiq bilmirəm. Amma yəqin ki, ailə məsələsinə görə burda qalmadı və İsrailə qayıtdı.
- Bəs siz Azərbaycanda özünüzü necə hiss edirsiz? Burada yaşamaq, futbol oynamaq rahatdır?
- Açığı, burada özümü əla hiss edirəm. Hər şey xoşuma gəlir. Azərbaycanda futbol oynamaqdan həzz alıram.
- İsrail və Azərbaycan bir çox cəhətdən fərqli ölkələrdir. Bu mənada yeni gələndə adaptasiya problemi yaşamadın?
- Xeyr, ciddi problemlə üzləşmədim. Xırda çətinliklər oldu ki, bunu da klubum yoluna qoydu. Mənə yaxından köməklik göstərdi.
- Sumqayıtda qalırsız?
- Xeyr, ailəmlə birlikdə Bakıda yaşayıram.
- Komanda yoldaşlarınız, məşqçilərinizlə necə ünsiyyət saxlayırsız? Dili bilməməyiniz çətinlik yaradır?
- Bəzi futbolçular və köməkçi məşqçi ingilis dilini bilir. Onlar lazım olan hər şeyi mənə tərcümə edirlər.
- "Sumqayıt"da iranlı futbolçular da çıxış edir. Ümumiyyətlə, Peyman Babayi, Mehdi Şərifi ilə münasibətləriniz necədir?
- Biz çox yaxşı dostuq. Heç bir problem yoxdur.
- Yəni deyirsiz ki, İran və İsrail arasındakı siyasi gərginliyin münasibətlərinizə heç bir mənfi təsiri yoxdur?
- Əlbəttə ki, yox. Biz ümumiyyətlə siyasətlə maraqlanmırıq.
- Azərbaycanla hər hansı bağınız, əlaqəniz var?
- Ailəm burada anadan olub.
Qeyd edək ki, sonuncu sualdan sonra Ağayev klubun danışmağa icazə vermədiyini söyləyərək, digər suallarımıza cavab vermədin imtina etdi: "Dostum, üzrlü say, danışa bilmərəm. Çünki klub icazə vermir".
Elnur SALAHOV