“Mövsümə iki qələbə ilə başlamaq xoş haldır.
Uğurlu çıxışın davamını gətirməliyik”.
“Sumqayıt”ın futbolçusu Rövlan Muradov Sportinfo.az-a açıqlamasında komandasının “Qəbələ” üzərində qazandığı qələbəni şərh edib.
Yayda ciddi dəyişikliklərə məruz qalan “kimyaçılar” yeni mövsümə uğurlu start verib.
Samir Abasovun qurduğu komanda “Səbail”i 4:1 hesabı ilə məğlub edəndən sonra “Qəbələ”ylə səfər matçından da 3 xalla qayıtdı – 2:1.
İki oyunda vurduğu 1 qol, verdiyi 3 məhsuldar ötürnə ilə diqqətləri üzərinə çəkməyi bacaran Muradov uğurlu çıxış haqda bunları deyib:
“Qeyri-adi heç nə etmirik. Sadəcə, baş məşqçinin tapşırıqlarına diqqətlə qulaq asıb, meydanda yerinə yetirməyə çalışırıq.
Komandada ab-hava yüksək səviyyədədir, sağlam mühit var. Hamı bir nəfər kimi meydanda canını qoyur.
İki qələbə ilə arxayınlaşmaq olmaz. Bunun davamını gətirmək lazımdır. “Araz-Naxçıvan”la matça ciddi hazırlaşırıq.
Məşqçilər heyəti əvvəlki oyunlarda yol verdiyimiz səhvləri diqqətimizə çatdırır. Çalışmalıyıq ki, onları aradan qaldıraq”.
Avqustun 25-də Premyer Liqanın 4-cü turu çərçivəsində keçiriləcək “Araz-Naxçıvan” – “Sumqayıt” qarşılaşması saat 20:00-da başlayacaq.
HƏBİB
