“Bu "Sumqayıt" "Qarabağ"ı uda bilməz - Dedim ki, heç kim heç kimin üstünə düşməsin”

15 Mart 2023 20:50 Sumqayıt 647
“Bu "Sumqayıt" "Qarabağ"ı uda bilməz - Dedim ki, heç kim heç kimin üstünə düşməsin”

"Sumqayıt" Azərbaycan Premyer Liqasının 27-ci turunda doğma meydanda "Qarabağ"a 0:5 hesabı ilə məğlub olub.

Sportinfo.az xəbər verir ki, qarşılaşmadan sonra təşkil olunan mətbuat konfransında "kimyaçılar"ın baş məşqçisi Samir Abasov sualları cavablandırıb:

- Sumqayıtımızın fəxri, bizim dostumuz İlham Zəkiyev Qran Pridə qızıl medal qazanıb. Onu təbrik edirəm. Oyuna gəldikdə isə, nə deyim vallah?! Bu "Sumqayıt" "Qarabağ"ı məğlub edə bilməz. Reallığı götürsək, bu, bizim gücümüzdə deyil. Bir baş məşqçi olaraq bunu anlayıram. Rəqibi təbrik edirəm. Çempionatın son mərhələsinə giririk. Qarşıda bizi çox vacib matçlar gözləyir. Son iki ağır məğlubiyyətdən sonra hazırlaşmaq üçün vaxtımız var. Kimlərin harada olduğunu çempionatın sonunda görəcəyik.

- Mətbuat konfransınlarının birində demişdiz ki, komandada ruh yoxdur. Bunun səbəbi nədir? "Qarabağ"a niyə bu qədər tez təslim oldunuz?
- Futbolçular meydana ümidlə çıxırlar. Qapıda qol gördükcə özünə, komanda yoldaşına inam itir. Belə məğlubiyyətlərdən sonra təhlilin üzərində dayanmıram. Buraxdığımız qollar bizim gücümüzü göstərir. Söhbət ruhdan, ürəkdən getmir. İki ötürmədən sonra topu itirirsənsə, hansı ürəkdən danışa bilərik? "Sabah" və "Qarabağ"la oynamaq bizim üçün çox çətindir. Meydanda nələrsə etməyə çalışırıq. Diqqətlə baxanda görünür ki, futbolçulara nələri etmək tapşırılıb. Bəlkə də səhv bizdədir ki, bunları etdirməyə, futbol oynatırmağa çalışırıq. Bu gün keyfiyyət bəllidir. Bütün komandalarla oynamaq olar. Amma bugünkü "Sumqayıt" üçün bu, çox çətindir.

- Fasilədə və matçdan sonra futbolçulara nə dediniz?
- Hec nə. Dedim ki, bu, futboldur, olur belə şeylər. Dünən Çempionlar Liqasında "Leyptsiq" 0:7 hesabı ilə uduzdu. Dedim ki, heç kim heç kimin üstünə düşməsin, bir azarkeş kimi ikinci hissədə meydanda futbol görmək istəyirəm. Bu gün 0:4, 0:6 hesabı ilə məğlub ilə bilərik. Amma elə şeylər göstərməliyik ki, digər matçlar üçün stimul versin.

Digər Xəbərlər
Xəbər Lenti