“Azərbaycanın İslam ölkəsi olduğunuöyrəndikdən sonar…”

13 Mart 2023 01:10 Sumqayıt 720
“Azərbaycanın İslam ölkəsi olduğunuöyrəndikdən sonar…”

Qış transfer dönəmində “Sumqayıt”a keçən Kərim Abubakar peşəkar karyerasına 2010-cu ildə ölkəsi Qanada başlayıb.

2013-cü ildə Avropaya yollanan futbolçu həmin vaxtdan karyerasını “köhnə dünya”da davam etdirir.

28 yaşlı hücumçu 2013-2021-ci illər ərzində İspaniyanın bir neçə aşağı liqa təmsilçisində çıxış edib. Forvard 2022-ci ilin yayında “Bney Yehuda”ya üz tutsa da, orada cəmi yarım mövsüm qalıb və bu ilin yanvarında “Sumqayıt”la 6 aylıq müqavilə imzalayıb.

Sportinfo.az xəbər verir ki, bu mövsüm “gənclik şəhəri” təmsilçisinin heyətində 7 oyunda 2 qol vuran və “Turan Tovuz”la “Şamaxı” üzərində qalibiyyət gətirən topun müəllifi olan Kərim Abubakar “report”un suallarını cavablandırıb.

- “Sumqayıt”a və Azərbaycana artıq uyğunlaşa bilmisiniz?
- Düşünürəm ki, komanda yoldaşlarımla bir-birimizi indi daha yaxşı tanıyırıq. Düzünü desəm, Azərbaycanda ilk dəfədir oluram və bura artıq çox xoşuma gəlir.

- Uzun müddət İspaniyada, ardından isə İsraildə oynamısınız. Azərbaycan Premyer Liqasının həmin liqalarla müqayisədə hansı mənfi və müsbət cəhətləri var?
- Bəli, 7 il İspaniyada çıxış etmişəm və orada çox şey öyrənmişəm, Həmçinin İsraili də qeyd etməliyəm. Azərbaycan futbolu çox yaxşı inkişaf edir. Bunu daha da yaxşılaşdıracaq tək şey azarkeşlərin sevimli komandalarını dəstəkləmək üçün stadiona getmələridir. Çünki İspaniyanın hətta IV liqasında azarkeşlər oyunlara buradakından çox gəlirlər. Bu amil matçı daha da maraqlı edir.

- Ümumiyyətlə, Azərbaycandan təklif gələndə burada çıxış edən hansısa həmyerlinizlə məsləhətləşdiniz?
- Əvvəllər “Sumqayıt”da oynamış bir neçə tanış futbolçu ilə, həmçinin, “Qarabağ”da oynamış dostum Kvabena Ovusu ilə məsləhətləşmişdim.

- “Sumqayıt” variantı yarananda Azərbaycan futbolu ilə bağlı hansı məlumata malik idiniz?
- Mən açıq fikirli insanam. Dostlarımla məsləhətləşdikdən və Azərbaycanın İslam ölkəsi olduğunu öyrəndikdən sonra bura gəlişim asanlaşdı.

- Əcnəbi futbolçular adətən buradakı mətbəxdən razılıq, tıxacdan narazılıq bildirirlər. Sizin diqqətinizi nə çəkib?
- Sevindirici haldır ki, Sumqayıtda tıxac yoxdur. Bu baxımdan hər şey yaxşıdır. Stadiondan məscidi görmək də çox xoşdur.

- “Sumqayıt”la müqaviləniz mövsümün sonuna qədərdir. Klubdan yeni müqavilə təklifi almısınız? Ümumiyyətlə, növbəti mövsümlə bağlı planlarınız nələrdir?
- Hələ yeni müqavilə təklifi almamışam. Müntəzəm çıxış edirəm, yəqin ki, bütün bunlar nəzərə alınacaq. Gələn mövsümlə bağlı hələ heç nə düşünmürəm. Diqqətimi yüz faiz cari mövsümü çox yaxşı başa vurmağa və “Sumqayıt”ın elitada qalmasına kömək etməyə cəmləmişəm.

Digər Xəbərlər
Xəbər Lenti