"Açığı, qol vuracağım əvvəlcədən ürəyimə dammışdı".
Bu sözləri Sportinfo.az-a açıqlamasında "Sumqayıt"ın kapitanı Vurğun Hüseynov deyib.
Premyer Liqanın 16-cı turunda "Kəpəz"ə vurduğu qola komandasına cari mövsümün ilk qələbəsini qazandıran müdafiəçi həmin anda fərqlənəcəyini hiss etdiyini dilə gətirib:
"Hətta cərimə zərbəsindən əvvəl Rüfət Abdullazadə ilə danışdım ki, ötürməni bacar, mən olan zonaya göndər.
O da həqiqətən mükəmməl ötürmə verdi. Vurduğum baş zərbəsindən sonra top "doqquzluğ"a daxil oldu. Bu, Allahın qisməti idi ".
Vurğun Hüseynov Azərbaycan çempionatlarında 10-cu dəfə fərqlənib. Müdafiəçi “Qəbələ”də 4, “Turan”la “Sumqayıt”ın hərəsində 3 qol vurub.
