"Qələbə qazanmaq hər zaman gözəldir”.
Bu sözləri Sportinfo.az-a açıqlamasında “Sumqayıt”ın şimalı makedoniyalı legioneri Todor Todorovski deyib.
“Sumqayıt” Premyer Liqanın 2022/23 mövsümündə ilk qələbəsini qazanıb.
“Gənclik şəhəri” təmsilçisi 16-cı turda “Kəpəz”ə qalib gəlib. Samir Abasovun yetirmələri səfərdə 1:0 hesabı ilə qələbə qazanıb.
Sumqayıtın eyniadlı təmsilçisi sonuncu dəfə 2022-ci il mayın 21-də qalib gəlmişdi. Bu, ötən mövsümün son turuna təsadüf edib. Həmin gün sumqayıtlılar “Səbail”i 5 cavabsız qolla udub.
197 gündən sonra qazanılan qələbə yubileylərlə də əlamətdar olub. “Sumqayıt” Premyer Liqada 75-ci dəfə qapısını toxunulmaz saxlayıb. Bu görüşlərin 41-i evdə, 34-ü səfərdə keçirilib.
23 yaşlı müdafiəçi bundan sonrakı arzularının Gəncədə əldə etdiyi ilk qələbənin davamını gətirmək olduğunu söyləyib:
“İndi qələbə ruhumuzu davam etdirib, növbəti iki oyuna maksimum hazırlaşmalıyıq. Əsas hədəfimiz son iki oyunda yaxşı nəticə qazanıb, fasiləyə yaxşı əhval-ruhiyyə ilə yollanmaqdır.
Qarşıdakı turlarda naksimum nəticə qazanıb həm azarkeşimizi sevindirməliyik, həm də turnir cədvəlindəki vəziyyətimizi yaxşılaşdırmalıyıq”.
