.jpg)
Ötən tur “Neftçi”ylə bərabərə qalan “Sumqayıt”da üzlər gülür.
Ardıcıl məğlubiyyətlərdən sonra toparlanan “kimyaçılar”ın ölkənin son çempionuna məğlub olmaması düşərgədəki ab-havanı xeyli yaxşılaşdırıb.
Bunu Sportinfo.az-a açıqlamasında komandanın kapitanı Vüqar Mustafayev də təsdiqləyib:
“Son turda “Neftçi” ilə qarşılaşmada heç-heçə etmişik. Komanda daxilində abu-hava yüksəkdir. Tam gücümüzlə məşqçilərin verdiyi tapşırıqları məşqlərdə etməyə çalışırıq”.
Sumqayıt təmsilçisi sabah “Bank Respublika Arena”da “Sabah”ın qonağı olacaq. Həmin komanda ki, çempionatın ilk dövrəsində qələbə sevinci yaşamayıb.
Buna baxmayaraq, “tələbələr” “Qarabağ”la sonuncu qarşılaşmada məğlub olsa da (1:2), xoş təsir bağışladı.
Yarımmüdafiəçi bütün narahatedici məqamlara rəğmən, qələbə istəklərini gizlətmədi: “Ümumi götürsək, “Sabah”la qarşılaşmaya çox ciddi hazırlaşırıq.
Bizi bu tur olduqca çətin qarşılaşma gözləyir. Rəqibin çempionatda qələbə qazanmaması oyunun çətin keçəcəyindən xəbər verir.
İnşallah, bu oyunda qələbə qazanıb həm azarkeşlərimizi sevindirərik, həm də fasilədən sonra özümüz də qələbəyə sevinərik”.
“Sabah” – “Sumqayıt” qarşılaşması bu gün saat 16.00-da başlayacaq.
HƏBİB
.jpg)
