Azərbaycan Kubokunda daha bir yarımfinalçı müəyyənləşib.

Sportinfo.az xəbər verir ki, 1/4 finalın cavab görüşündə "Səbail" "Sumqayıt"ı qəbul edib.

"ASCO Arena"dakı qarşılaşma "gənclik şəhəri" təmsilçisinin 2:1 hesablı qələbəsi ilə yekunlaşıb. Oyunda hesab 20-ci dəqiqədə açılıb.

"Sumqayıt"ın heyətində Rəhim Sadıxov penaltini dəqiq yerinə yetirib. 3 dəqiqə sonra Əli Qurbani fərqi iki topa çatdırıb. 90+6-cı dəqiqədə isə Əfran İsmayılov penaltidən təsəlli qoluna imza atıb.

"Sumqayıt" ilk matçda rəqibinə 0:1 hesabı ilə uduzmasına baxmayaraq yarımfinala yüksəlib. Komanda bu raundda "Qarabağ"la qarşılaşacaq.

Ağdam klubu 1/4 finalın hər iki qarşılaşmasında "Qəbələ"ni məğlub edib - 3:1, 3:0. Yarımfinalın ilk oyunları aprelin 21-də, cavab qarşılaşmaları isə aprelin 29-də keçiriləcək.

"Rəqibi mərhələni keçməsi münasibəti ilə təbrik edirəm. Ancaq təbriklə kifayətlənmək niyyətində deyiləm. Bilmirəm, bu adətdir, yoxsa nədir. Ardıcıl ikinci mövsümdür ki, hakim səhvlərinə görə 1/4 final mərhələsini adlaya bilmirik".

Bu fikirləri "Səbail"in baş məşqçisi Aftandil Hacıyev Azərbaycan Kubokunun 1/4 finalında evdə "Sumqayıt"a 1:2 hesabı ilə uduzduqları cavab oyunundan sonra mətbuat konfransında deyib.

40 yaşlı mütəxəssis bildirib ki, hakim səhvinə görə rəqibin qələbəsinə kölgə salmaq istəmir: "Fasilədən sonra biz hücumda daha aktiv idik. İlk oyunda da sayılmayan qolumuz oldu.

Futbolçuların əsəbləri ilə bu qədər oynamaq olmaz. Komandamızın oyunlarında hakim səhvləri çoxalır. İlk matçdakl qol da təmiz idi.

İstəməzdim hakimlik üzərində bu qədər dayanım, amma məcburam. Yenə də deyirəm, "Sumqayıt"ın qələbəsinə kölgə salmıram. Bütün gücümüzü çempionata yönəldəcəyik".

Hacıyev sıx qrafikə görə bəzi dəyişikliklərin zəruri olduğunu bildirib: "Amil Yunanov da, Ruslan Hacıyev da bizim əsas oyunçularımızdır. Bəlkə də hesabı nəzərə alsaq, Yunanovu oyuna daha erkən buraxmaq olardı.

Ancaq müdafiəçilərimiz də xeyli yorulmuşdu. İki hücumçuya keçdikdən sonra isə, əlavə vaxtı da nəzərə almaqla, 10 dəqiqəmiz var idi. Təəssüf ki, qolumuzu gec vurduq".