"Ağır və çətin səfər idi".
Bunu Sportinfo.az-a açıqlamasında ölkə kubokunun 1/8 final mərhələsində "Zaqatala" ilə qarşılaşan "Səbail"in yarımmüdafiəçisi Əfran İsmayılov deyib.
Təcrübəli yarımmüdafiəçi çətin və ağır səfər olmasına rəğmən, uzun müddətdən sonra Zaqatalada oynamağın xoş olduğunu bildirib: "Uzaq yol getdik. Amma bölgə klublarının olması yaxşıdır. Azarkeşlər əla ab-hava yaradır. Bilirsən ki, səfərə getmisən. Premyer Liqada da bölgə klubları olsa, rəqabət də artar".
İsmayılov rəqibin layiqli mübarizəsi ilə qarşılaşdıqlarını sözlərinə əlavə edib: "Birinci Divizon komandası olmasına rəğmən gərgin matç oldu. Başabaş mübarizə getdi. Sadəcə sonda təcrübə öz sözünü dedi. Çətin də olsa, şükür ki, turu keçən tərəf olduq".
