“Klubumuzun gələcək fəaliyyəti ilə bağlı bütün suallara mayın 20-dən sonra aydınlıq gətiriləcək”.
Bu sözləri Sportinfo.az-a açıqlamasında “Xan Lənkəran”ın mətbuat xidmətinin rəhbəri Famil Məmmədov bildirib.
Bilindiyi kimi, AFFA 3 bölgə klubunun növbəti mövsüm I Divizionda iştirakına dair qərar verib. “Araz Naxçıvan”, “İmişli” və “Mingəçevir” İcraiyyə Komitəsinin açıqladığı həmin siyahıya daxildir.
Ötən ilin yayında yaradılan və Region Liqasında mübarizəni hələ də davam etdirən “Xan Lənkəran” I Diviziona iddialı olsa da, federasiya onlara bu imkanı yaratmayıb.
Cənub təmsilçisi AFFA-nın qərarından müxtəlif qurumlara, o cümlədən, ölkə rəhbərliyinə müraciət ünvanlayıb.
F.Məmmədov hazırda gözləmə mövqeyi tutduqlarını və bütün fikirlərini Region Liqasının son oyunlarına yönəltdiklərini bildirib:
“Mayın 15-də “Araz-Naxçıvan”la yarımfinal oyununa çıxacağıq. Məqsədimiz ən azından finala çıxmaqdır.
Ən pis halda, üçüncü yer uğrunda mübarizə aparacağıq. Bununla parallel olaraq, I Divizionla bağlı müraciət etdiyimiz qurumlardan cavab gözləyirik.
Bu gün də ümid edirik ki, klubumuz I Diviziona buraxılacaq. Klubumuzun prezidenti Pərviz Hüseynov yaranmış vəziyyətlə bağlı hələ mətbuata açıqlama vermək fikrində deyil.
Mayın 20-dən sonra klubumuzun yeni planları və perspektivi barədə qərar veriləcək. Hər halda bir daha xatırlatmaq istəyirik ki, “Xan Lənkəran”ın yaradılmasının tək məqsədi futbola xidmət etməkdir”.