DÇ-2026-nın seçmə mərhələsinin ilk iki turunda Fransa və Azərbaycan milliləri ilə qarşılaşacaq Ukraynanın heyətində dəyişiklik edilə bilər.
Sportinfo.az yerli mətbuata istinadən xəbər verir ki, müdafiəçi Vitali Mikolenko kollektivdən ayrı qala bilər.
“Everton”un üzvü avqustun əvvəlində “Roma” ilə yoldaşlıq görüşündə zədələndikdən sonra İngiltərə Premyer Liqasının ilk iki turunu buraxmalı olmuşdu.
Zədəsini yenicə sağaldan 26 yaşlı futbolçu İngiltərə Liqa Kubokunun 1/32 final mərhələsində “Mansfild”lə görüşdə (2:0) iştirak edib.
Lakin Mikolenkonun fiziki durumunun ürəkaçan olmaması və formadan uzaq düşməsi baş məşqçi Sergey Rebrovun qərarını dəyişməsinə səbəb ola bilər.
Çalışdırıcı Mikolenkonu milliyə çağırsa da, onun hazırlıq durumunu diqqətdə saxlayacaq.
Ukrayna yığması sentyabrın 5-də Vrotslavda Fransa, 9-da isə Bakıda Azərbaycan millisi ilə qarşılaşacaq.
