Fransalı keçmiş futbolçu Lassana Diarra FİFA-nın qaydalarına görə karyerası boyunca ziyan çəkdiyi üçün 65 milyon avro (vergi çıxılmadan) tələb edir.

Sportinfo.az xəbər verir ki, bu barədə Beynəlxalq Peşəkar Futbolçular Assosiasiyaları Federasiyası (FIFPro) məlumat yayıb. Məhkəmə işi Belçikada aparılır.

4 oktyabr 2024-cü ildə Avropa İttifaqı Məhkəməsi (CJEU) FİFA-nın transfer sistemi ilə bağlı qərar qəbul edib və bu sistemi Avropa İttifaqının əmək hüququ və rəqabət qanunları ilə ziddiyyətli hesab edib.

Məhkəmə təsdiqləyib ki, transfer qaydaları oyunçuların əmək müqavilələrini qanuni səbəb olmadan ləğv etmək hüququnu məhdudlaşdırır.

FIFPro bildirir ki, 2001-ci ildən qüvvədə olan qaydalar oyunçulara ciddi maddi ziyan vurub və Lassana Diarra da istisna deyil.

Müstəqil iqtisadi təhlil göstərib ki, bu qaydaların Diarranın karyerasına vurduğu ziyan əhəmiyyətlidir. Buna əsaslanaraq, 40 yaşlı sabiq futbolçu FİFA-dan tam kompensasiya tələb edir.

Əvvəlki sülh yolu ilə razılaşma cəhdləri uğursuz olub, çünki FİFA iddia olunan ziyanın ödənilməsinə konstruktiv yanaşmayıb.

Diarra bu məbləğin 65 milyon avro vergi çıxılmadan, yaxud 35 milyon avro təmiz formada ödənilməsini tələb edir.

Bu iş FIFPro, FIFPro Avropa tərəfindən tam dəstəklənir. Məhkəmənin qərarı futbolun transfer sisteminə təsir göstərə və oyunçuların hüquqlarını gücləndirə bilər.

Diarra karyerası ərzində “Çelsi”, “Arsenal”, “Real”, PSJ kimi klublarda çıxış edib.