“Neftçi” avrokubok mövsümünə bərbad başladı.

Öz meydanında Minsk “Dinamo”sunu qəbul edən “ağ-qaralar” ilk 8 dəqiqədə rəqib qapısına 2 dəfə yol tapsa da, 90 dəqiqənin tamamına qədər öz qapısından 4-nü buraxıb uduzdu.

Oyunun gedişində hər kəs şokda idi. Kimsə nələrin baş verdiyini anlaya bilmirdi.

Sloveniyada hazırlıq keçən, heyəti yeni futbolçularla gücləndirən, imkanlarına görə “Dinamo”nu qat-qat üstələyən “Neftçi” niyə bu hala düşdü?

Xüsusən qonaq komanda üçün stadionu cəhənnəmə çevirən “Neftçi” azarkeşlərinin qəzəbi yerə-göyə sığmırdı. Narazılıq, etiraz, tənqir, yeri gələndə təhqirlə hirsini soyutmağa çalışan fanatların üzgünlüyü anlaşılandır.

“Forza Neftçi”nin rəhbəri Səccad Abasov sosial şəbəkə hesabında etdiyi paylaşımla klub və komandadakı şəxslərə barmaq silkələyib:

“Bu gün siz nə etdiniz? Bu, nə idi?

Bu, “Neftçi” deyil, bizə ümid verib, baş aldatmaqdır.

Uğursuz transferlər, Avropada “al-ver” edib gəlmək. Bugünkü “işləmək” də nəzərdən yayınmadı.

Yubiley mövsümü yubiley biabırçılığı olmağa doğru getməsin. Ağlınızı başınıza yığın! Bura “Neftçi”dir!

80 illiyin faciəsini 90 illiklə əvəzləmək niyyətiniz varsa, indidən qılınc-qalxanımızı götürüb keçək qarşınıza. Mövsümboyu qazandıqlarınızı zəhər edək.

“Neftçi” bazar deyil, “Neftçi” xalqdır. Bizi yanıldın və bir həftədən sonra meydana çıxıb tökdüyünüz zibilləri təmizləyin”.

İyulun 22-də 8-ci kilometr stadionunda 2:4 hesabı ilə məğlub olan təmsilçimiz.

Komandalar arasındakı cavab qarşılaşması iyulun 30-da Bolqarıstanın Stara Zaqora şəhərindəki “Beroe” stadionunda keçiriləcək və start fiti Bakı vaxtı ilə saat 21:00-da çalınacaq.

HƏBİB / SPORTİNFO.AZ