Türkiyənin Bolu şəhərində təlim-məşq toplanışında olan "Neftçi" sonuncu yoxlama oyununu keçirib.
Sportinfo.az xəbər verir ki, Laurentsiu Regekampfın baş məşqçi olduğu komanda Türkiyə Super Liqasında çıxış edən "Qaziantep"lə üz-üzə gəlib.
Qarşılaşma qolsuz bərabərliklə başa çatıb.
"Neftçi" oyunun yayımlanmasını istəməyib. Türkiyə təmsilçisi görüşü rəqib komandanın rəsmi yutub kanalından göstərilsə də, yayım 22-ci dəqiqədən sonra dayandırılıb.
Superliqa təmsilçisi "Neftçi"nin istəyinə və komandanın avrokubok matçına görə bu addımı atdığını bildirib.
Boludakı ilk yoxlama matçında "Sakaryaspor"la 1:1 hesablı heç-heçə edən "ağ-qaralar" növbəti görüşündə "Sivasspor"a uduzub - 0:1.
"Neftçi" UEFA Konfrans Liqasının II təsnifat mərhələsində Kipr "Aris"i ilə üz-üzə gələcək. Komanda ilk oyununu iyulun 21-də səfərdə, cavab görüşünü isə iyulun 28-də evdə keçirəcək.
