.jpg)
“Barselona”nın prezidenti Xuan Laporta, klubun keçmiş baş məşqçiləri Luis Enrike və Ernesto Valverde İspaniya Kral Futbol Federasiyası Hakimlərin Texniki Komitəsinin keçmiş vitse-prezidenti Xose Neqreyraya mümkün qanunsuz ödənişlərlə bağlı istintaqda şahid qismində dindiriləcəklər.
Sportinfo.az COPE-yə istinadən xəbər verir ki, Laporta və digər iki mütəxəssisin çağırılması barədə qərarı hakim Alejandra Gil verib.
Prokurorluq onların ifadələrinin klubla Neqreyra arasında mümkün əlaqələrin təfərrüatlarını müəyyən etmək üçün açar ola biləcəyini düşünür. Dinləmə tarixi daha sonra təyin olunacaq.
Bundan əvvəl bu işdə təqsirləndirilən “Barselona”nın keçmiş prezidentləri Sandro Rossel və Xosep Mariya Bartomeu artıq ifadə verib.
İstintaq 2001-2018-ci illər arasında Neqreyranın konsaltinq xidmətləri üçün klubdan təxminən 7,5 milyon avro aldığını göstərir. Məhkəmə 2024-cü ilin mayında rüşvətxorluq iddiası ilə bağlı ittihamları müvəqqəti olaraq ləğv edib, lakin istintaq davam edir.
Enrike hazırda PSJ-yə, Valverde “Atletik”ə rəhbərlik edir.
