«Əslində, bu, futzalda normal hesabdır. Mən bunu böyük hesab saymıram».
Bu sözləri Sportinfo.az-a açıqlamasında «Baku Fire»nin baş məşqçisi Teymur Eyvazov deyib.
Futzal üzrə Yüksək Liqada XIII turun oyunları keçirilib. Turun mərkəzi oyununda lider “Araz Naxçıvan”la ən yaxın izləyicisi “Baku Fire” üz-üzə gəlib.
Qış fasiləsinə qədər keçirilmiş hər iki oyunda qalib gəlmiş Joze Alesio Da Silvanın yetirmələri bu dəfə də sürprizə imkan verməyib.
“Araz-Naxçıvan” ardıcıl 4 qol vurduqdan sonra “Baku Fire” fasilə ərəfəsində fərqi 3-ə endirib. İkinci hissədə ilk qolu nominal qonaqlar vursa da, lider fərqin azalmasına göz yummayıb.
Əksinə, yenə ardıcıl qollar vurmaqla fərqi 7 top çatdırıb. Xətai Bağırov və Nata Felipe de Moraes het-trik etməklə yadda qalıb - 10:2.
Eyvazov 10 qol buraxmaqlarına rəğmən, komandasının çıxışından narazı olmadığını bildirib:
«Yaxşı oyun nümayiş etdirdik. Oyunçularımın hamısından razıyam.
Çempionatda komanda sayının az olması işimi çətinləşdirir. Hazırlıq oyunları keçirməyə rəqib tapa bilmirik.
O üzdən də, «Araz Naxçıvan»la qarşılaşmanı bizim üçün hazırlıq oyunu hesab edirəm. Bu oyunlardan nəticələr çıxarıb, hazırlıq proseslərində nəzərə alacağıq.
Çempionat davam edir, qarşıda pley-off mərhələsi var. Çempion yalnız final oyunundan sonra məlum olacaq».
