Bu gün Misli Premyer Liqasında 22-ci tura start veriləcək.
Sportinfo.az xəbər verir ki, 4 futbolçu cəza səbəbindən ikinci dövrənin son matçını buraxmalı olacaq.
Onlardan ikisi “Kəpəz”in formasını geyinir. Turun açılış görüşündə “Sumqayıt”ı qəbul edəcək gəncəlilərdə iki yerli futbolçu meydana çıxa bilməyəcək.
Rauf Hüseynli 4 sarı vərəqə limitini doldurduğu, Şakir Seyidov isə “Sabah”la son oyunda qırmızı vərəqə aldığı üçün məşqçilər korpusunun sərəncamında olmayacaq.
“Araz-Naxçıvan”ın qonağı olacaq “Zirə” aparıcı futbolçularından olan Ruan Renatodan yararlana bilməyəcək. Çünki braziliyalı müdafiəçi 4 sarı vərəqə limitini ötən turda doldurub.
“Şamaxı”da isə Alfons Msanqa eyni durumla üzləşib. Lakin tanzaniyalı yarımmüdafiəçi 8-ci dəfə sarı vərəqə ilə cəzalandırılıb.
Bu üzdən o, cari mövsümdə ikinci dəfə cəzalı duruma düşüb. Msanqa “Neftçi” ilə matçı buraxmalı olacaq.
Misli Premyer Liqasında 22-ci tur 27 fevral – 1 mart aralığında keçiriləcək.
