Riad Rəfiyev 2018-ci ilin əvvəlindən prezidenti olduğu «Sumqayıt»ı tərk etmək istəyib.
Sportinfo.az bu barədə AFFA rəhbərliyinə yaxın mənbələrdən məlumat əldə edib.
«Kimyaçılar»ın başqanı postunda Kamran Quliyevi əvəzləmiş Rəfiyev vəzifəsindən getməsinə icazə verməsi üçün AFFA-nın icraçı vitse-prezidenti Elxan Məmmədovla danışıb. Onların söhbəti qısa çəkib.
Federasiyanın bir nömrəli şəxsi Riad bəyə «Sumqayıt»da fəaliyyətini davam etdirməsini tapşırıb. Məmmədov bunun üçün uyğun zaman gözləməyi, vaxtı çatanda onu daha yaxşı işlə təmin edəcəyini bildirib.
Rəfiyevi incik salan səbəblər ciddidir. Ən birincisi də, «Azərikimya»nın kluba etinasız münasibəti. O, büdcənin artırılması xahişi ilə bir neçə dəfə şirkət rəhbərliyinə müraciət ünvanlasa da, sözü yerə düşüb.
Belədə yayın ilk ayından etibarən «Sumqayıt»ın problemləri daha da artıb. Əksər aparıcı futbolçular düşərgə ilə vidalaşıb, borclar qalaqlanıb, narazılıq çoxalıb. «Azərikimya» klubun tarixində ilk dəfə avrokuboklara qatılmasını nəzərə almaq əvəzinə, büdcəni əvvəlki səviyyəsindən də aşağı salıb.