«Sumqayıt» builki yarışmaya avrokuboklara qayıtmaq məqsədi ilə başlamayıb.
Samir Abasovun dilindən belə bir söz çıxmayıb.
O, ümumiyyətlə, iddiaları barədə heç nə danışmır. Tipik türkiyəli həmkarları kimi: «Önümüzdəki matça baxacağıq».
Mənə o maraqlı idi ki, ötən həftə öz meydanında «Qarabağ»a 1:6 hesabıyla uduzmuş «Sumqayıt» qərb səfərində özünü ələ ala biləcək, ya yox.
Axır həftələrdə yüksəlişə keçən «Kəpəz»dən 3 xal qoparmaq üçün bir hissə əziyyətə qatlaşdılar. Abu Dosso zədələnib erkən əvəzlənməsəydi, Samir Abasov Tovuzdan mahnı oxuya-oxuya qayıdacaqdı.
Məhz Fili Dişi Sahilindən olan müdafiəçinin sıradan çıxması «Sumqayıt»ın bütün planlarını, oyun nizamını, əhval-ruhiyyəsini pozdu.
Afrikalı legionerin yoxluğunu hər ötən dəqiqə bir qədər də çox hiss etdilər, arxa xətdə boşluqlara yol verdilər. Ona kimi hesabı açmasaydılar, sonda 1 xal da onların olmayacaqdı.
Dossonun itkisi Samir Abasovu qayğılandırmalıdır. Tək afrikalının zədələnməsinə görə yox amma.
Ehtiyat skamya qısadır, 1-2 nəfər meydanda olmayanda komanda bundan öz «nəsib»ini alır.
Və baş məşqçi onu da hesaba qatmalıdır ki, futbolçuları tez-tez sıradan çıxır.
Bir bunu araşdırmalı və səbəbini dəqiqləşdirməlidir, bir də transfer bazarında hərəkətliyi təmin etməlidir. Azından 2-3 yeni sima qapıdan içəri ayaq basmalıdır.
MUSA