Məlum olduğu kimi, Region Liqasında 1/4 final mərhələsinə yekun vurulub.
Sportinfo.az xəbər verir ki, çempionluğun əsas namizədlərindən sayılan «Xan Lənkəran» öz meydanında «Füzuli»ni qəbul edib.
İlk görüşdə 3:1 hesablı qələbə qazanan cənublular bu dəfə də azarkeşlərini sevindirib. İbrahim Uzuncanın çalışdırdığı komanda rəqibini 3:0 üstələyib.
«Ağ-yaşıllar»ın heyətində Məhəmməd Xəlilov, İlyas Səfərzadə və Elvin Hüseynzadə fərqlənib.
Lənkəranlıların bundan öncə Qusar «Şirvanovka»sını mübarizədən kənarlaşdırmasını yada salaq.
«Xan Lənkəran» yarımfinalda Naxçıvan bölgəsinin lideri olan «Araz-Naxçıvan»la üz-üzə gələcək.
