“Qəbələ” bu gün növbəti oyununu keçirib. “Qırmızı-qaralar” Azərbaycan Premyer Liqasının VI turunda “Neftçi” ilə görüşüb.
Komanda Qəbələ şəhər stadionundakı matça ötən turdakı start heyəti ilə başlayıb. Belə ki, “qırmızı-qaralar”ın çalışdırıcısı Elmar Baxşıyev “Səbail”lə səfər oyunundakı “11-liy”ə güvənib.
Qarşılaşmanın startı Merab Qiqaurinin ilk dəqiqədəki uzaq zərbəsi ilə diqqət çəkib. Lakin gürcüstanlının çərçivəyə gedən zərbəsi istənilən kimi alınmayıb. Üstünlüyə yiyələnən paytaxt təmsilçisi daha çox hücum etsə də, “Qəbələ”nin sürətli əks-həmlələri diqqət çəkib.
İlk 45 dəqiqədə Anar Nəzirovun qapısı önündə bir neçə təhlükəli epizod yaranıb. O, epizodların birində topu qapı xəttinin üzərindən qaytarıb. Ev sahibləri isə fasiləyədək uzaqdan zərbələrlə rəqib qapıçıya həyəcan yaşadıblar. Oyunun 39-cu dəqiqəsində zədələnən Rasim Ramaldanov matçı davam etdirə bilməyib. Onu Sadiq Quliyev əvəzləyib.
İkinci hissəyə “Qəbələ” nisbətən fəal başlayıb, ilk dəqiqələrdə bir neçə hücum təşkil edib. Lakin təşəbbüsü əldən verməyən “Neftçi” az keçməmiş hesabı açmağı bacarıb. Tural Axundovun uzaq zərbəsi qolla nəticələnib.
Elmar Baxşıyev əvəzetmələrlə oyunun axarını dəyişməyə çalışa da, hissənin ortalarında qonaqlar daha bir qol vurub. Rauf Əliyev fərqi artırıb. Matçın son dəqiqələrində isə Stiven Monroz qonaqların üçüncü qoluna imza atıb. Beləliklə, “Qəbələ” I dövrənin son ev oyunundan xalsız ayrılıb – 0:3.
“Qəbələ”nin çalışdırıcısı Elmar Baxşıyev: “Oyunun çətin keçəcəyini təxmin edirdik. “Neftçi” heyətinə görə yaxşı balanslaşmış komandadır. Rasim Ramaldanovun birinci hissədə zədələnməsindən sonra müdafiədə boşluqlar verdik. Rəqib də bundan maksimum istifadə etdi. Bunu ustalıq səviyyəsi ilə izah edərdim.
“Neftçi” hər mövqedə, hər komponentdə bizdən üstün görünür. Gənc komandayıq. Artırmaq üçün potensialımız var. Komandaya inanırıq. Gənc futbolçularımız matçdan-matça daha yaxşı oyun göstərəcəklər. Biz də istəyərdik ki, doğma meydanımızda azarkeşlərimizi sevindirək. Lakin istəyimiz alınmadı.
“Neftçi” layiqli qələbə qazandı. Rəqibi təbrik edirəm. Komandanı görüşə hazırlayarkən müdafiədən oynamaq barədə düşünmürdük. Amma rəqibin ustalığı daha üstün olduğundan bizi müdafiədə oturmağa məcbur etdi. Rasim Ramaldanovun dizi şişib, indi nə isə demək çətindir. O, üç gündən sonra müayinə olunacaq”.
“Qəbələ” – “Neftçi” 0:3
Qəbələ şəhər stadionu, 600 tamaşaçı
Baş hakim: Kamal Umudlu
Baş hakimin köməkçiləri: Cavanşir Yusifov, Eyyub İbrahimov
Dördüncü hakim: Namiq Bəkirov
Hakim-inspektor: Ömər Paşayev
AFFA nümayəndəsi: Seymur Səlimli
Sarı vərəqələr: Merab Qiqauri, 16 (qeyri-idman hərəkəti); Amin Seydiyev, 48 (qeyri-idman hərəkəti); İviça Zuniç, 53 (qeyri-idman hərəkəti) // Emin Mahmudov, 14 (hakimin qərarına etiraz); Kiril Petrov, 66 (qeyri-idman hərəkəti)
Qollar: Tural Axundov, 59; Rauf Əliyev, 73, Stiven Monroz, 89
Artırılan vaxt: I hissədə 6 dəq; II hissədə 3 dəq.
“Qəbələ”
1. Anar Nəzirov (k)
8. Qismət Alıyev
5. Rasim Ramaldanov
(4. Sadiq Quliyev, 40)
7. Roman Hüseynov
14. Ülvi İsgəndərov
(11. Asif Məmmədov, 66)
9. Davit Volkov
3. İviça Zuniç
77. Merab Qiqauri
21. Fernan Lopez
(13. Kristian Kuaku, 76)
19. Rövlan Muradov
2. Amin Seydiyev
Ehtiyat oyunçular:
94. Tərlan Əhmədli
74. Yusif Nəbiyev
28. Murad Musayev
10. Klesio Bauk
20. Faiq Hacıyev
22. Rüstəm Nuriyev
15. Vüsal Məsimov
Baş məşqçi: Zaur Həşimov
“Neftçi”
1. Səlahət Ağayev
7. Namiq Ələsgərov
(28. Stiven Monroz, 73)
8. Emin Mahmudov (k)
18. Tural Axundov
25. Kiril Petrov
93. Soni Mustivar
10. Dario Frederiko
(11. Evangelos Platellas, 86)
9. Baqali Dabo
(19. Rauf Əliyev, 72)
36. Mamadu Kane
6. Voyislav Stankoviç
26. Ömər Buludov
Ehtiyat oyunçular:
30. Aqil Məmmədov
12. Kamran İbrahimov
17. Rəhman Hacıyev
3. Mamadu Mbodj
5. Anton Krivotsyuk
33. Turan Vəlizadə
80. İsmayıl Zülfüqarlı
Baş məşqçi: Roberto Bordin
