Yevlax şəhər stadionunda örtüyün dəyişdirilməsi prosesi başa çatıb.
İndi yox, hələ iki həftə əvvəl.
Lakin “Karvan-Yevlax” ev oyunlarını doğma şəhərdə yox, Şamaxıda keçirməkdə davam edir.
Oktyabrın 24-də 9-cu tur çərçivəsində “Turan Tovuz”la baş tutacaq oyunun da Şamaxıda gerçəkləşməsi nəzərdə tutulub.
Yevlaxdakı stadion hazırdırsa, komanda niyə qapılarda qalıb?
Bunun başlıca səbəbi UEFA-dan gəlməli olan nümayəndələrin səfərinin yubanmasıdır.
Həm Yevlaxda, həm də Tovuzda yenilənmiş örtüyü gözdən keçirəcək qurum rəsmiləri qazona qiymət verəcək. Bundan sonra isə PFL-in əməkdaşları Yevlaxa yollanıb həm meydanı, həm də stadiondakı ümumi vəziyyəti təftiş edəcək.
Yoxlama prosesinin gələn həftə, ən pis halda oktyabr ayının sonuna qədər başa çatması planlaşdırılıb.
Bu, o deməkdir ki, noyabrın 1-də 10-cu tur çərçivəsində “Karvan-Yevlax”ın “Zirə”ni doğma azarkeşlərinin önündə qəbul etməsi mümkün olacaq.
Yəni klub rəhbərliyi üzərinə düşən işi çoxdan yerinə yetirib. Azarkeşlərin gözünü yolda qoyan UEFA-dan gəlməli olan nümayəndələrdir.
HƏBİB / SPORTİNFO.AZ
