AFFA İcraiyyə Komitəsinin üzvü, Məşqçilər Komitəsinin sədri Vaqif Sadıqov Canni De Byazi ilə müqavilənin uzadılmasını özünəməxsus tərzdə şərh edib.

Bu şərhdən sonra tam əmin olursan ki, Vaqif Sadıqov heç vaxt dəyişməyəcək.

O, tutduğu yoldan - futbolun inkişafını bacardığı qədər əngəlləməkdən imtina etməyəcək. Yuxarılara yarınmaq şakərini yerə qoymayacaq.

Baxırsan Rusiyaya, görürsən ki, ölkə prezidenti Putin deyir ki, limit olmalıdır.

Amma yığmanın baş məşqçi Valeri Karpin deyir ki, Putin səhv edir, limit olmamalıdır.

Guya özünü mütəxəssis hesab edən Vaqif Sadıqov isə Elxan Məmmədovun səhv qərarlarına etiraz edə bilmir.

Nə isə... gələk Vaqif müəllimin allı-güllü şərhinə. Deyib, De Byazi ilə müqaviləni ona görə uzatdıq ki, Millətlər Liqasını qurban verə bilməzdik.

Guya bizim Millətlər Liqasında böyük iddialarımız var, yeni məşqçi gələ, yeni komanda formalaşdıra bilərdi və bu da bizim iddiamıza zərbə vurardı.

Arxayın olun, Millətlər Liqasında uğursuz çıxışdan sonra Vaqif müəllim başqa cür “mala” vuracaq, bu sahədə, həqiqətən də peşəkardır.

Amma bu adama demək lazımdır ki, siz artıq Azərbaycan futbolunu qurban veribsiniz. Özü də çoxdan.

Vaqif müəllim, bəlkə elə düşünürsüz ki, bunu xalq bilmir? Arada qulağınızı Elxan müəllimin ağzından ayırıb, xalqa tərəf də tuşlayın.

Həngamə söhbətlər eşidəcəksiniz ey...

BİZ