Avropa Konfrans Liqasındakı yeganə təmsilçimiz olan “Neftçi” bu axşam Avstriyada meydana çıxacaq.
Rəqib ölkəsinin ən köklü klubu “Rapid”dir.
Avqustun 4-də Bakıda baş tutan ilk oyunda “ağ-qaralar” rəqibini 2:1 hesabı ilə məğlub edərək cavab matçı öncəsi üstünlük qazanıb.
Lakin söhbət “Neftçi”dən və səfər oyunundan gedirsə, həyəcanlanmamaq mümkün deyil.
Düzdür, bakılılar son 3 ildə səfər qarşılaşmalarında azarkeşlərini sevindirməyi bacarıb. 2019-cu ildə “Sperantsa” və “Arsenal”la (Tula) oyunlar zamanı “Neftçi” Bakıya qələbə ilə qayıtmışdı. Ötən yay Tbilisidə “Dinamo” üzərindəki qalibiyyət də unudulmayıb.
Lakin o vaxtdan bu yana vəziyyət ürəkaçan deyil.
“Ağ-qaralar” sonuncu səfər qələbəsini 2021-ci ilin 7 iyulunda, Çempionlar Liqasının birinci təsnifat mərhələsinin ilk oyunları çərçivəsində “Dinamo” üzərində əldə edib – 2:1.
“Neftçi” həmin tarixdən bu yana avrokuboklarda 4 səfər görüşə çıxıb ki, bütün hallarda məğlub olub. Yenilgilərdən 2-si böyük hesablı olub.
Ən dəhşətlisi isə təmsilçimizin 4 oyunun heç birində rəqib qapısına yol tapa bilməməsi və öz qapısından 10 cavabsız top keçirməsidir.
“Rapid”lə oyundan əvvəl ölkə çempionatının son gümüş medalçısının son səfər qarşılaşmalarına nəzər yetirək:
“Olimpiakos” (Yunanıstan) – “Neftçi” 1:0
HİK (Finlandiya) – “Neftçi” 3:0
“Makkabi Hayfa” (İsrail) – “Neftçi” 4:0
“Aris Limassol” (Kipr) – “Neftçi” 2:0
Mənzərə həqiqətən acınacaqlıdır. Ümid edək ki, “Neftçi” bu axşam Vyanada keçiriləcək oyunda uğursuz sindroma son qoyacaq. Ən pis halda heç-heçə ilə.
HƏBİB / SPORTİNFO.AZ